નવી દિલ્હી:  સોશિયલ મીડિયાના ડિજિટલ યુગમાં અફવાઓ કેટલી ઝડપથી ફેલાઈ શકે છે તેનું તાજું ઉદાહરણ ફરી એકવાર સામે આવ્યું છે. છેલ્લા કેટલાક દિવસોથી વોટ્સએપ અને ફેસબુક ગ્રૂપ્સમાં એક ચોંકાવનારો મેસેજ વાયરલ થઈ રહ્યો છે, જેમાં દાવો કરવામાં આવ્યો છે કે ભારતીય રિઝર્વ બેંક (RBI) માર્ચ 2026 સુધીમાં ATMમાંથી ₹500ની નોટો કાઢવાનું બંધ કરી દેશે. આટલું જ નહીં, મેસેજમાં એવું પણ કહેવાયું છે કે આ નોટો ધીમે ધીમે અમાન્ય જાહેર કરવામાં આવશે. આ સમાચાર સાંભળતા જ સામાન્ય જનતામાં 'બીજી નોટબંધી' જેવો ભય પેદા થયો હતો, પરંતુ કેન્દ્ર સરકારની ફેક્ટ-ચેકિંગ એજન્સી PIBએ આ મામલે મોટો ખુલાસો કર્યો છે.

PIB ફેક્ટ ચેકે સત્તાવાર રીતે સ્પષ્ટતા કરતા જણાવ્યું છે કે આ વાયરલ મેસેજ સંપૂર્ણપણે પાયાવિહોણો અને નકલી છે. એજન્સીએ ટ્વિટર (X) પર પોસ્ટ કરીને ખાતરી આપી છે કે કેન્દ્રીય બેંક દ્વારા બેંકોને આવા કોઈ જ નિર્દેશો આપવામાં આવ્યા નથી. હકીકતમાં, ₹500ની નોટ હાલમાં ભારતીય અર્થતંત્રનું મુખ્ય ચલણ છે અને તે વ્યવહાર માટે સંપૂર્ણપણે કાયદેસર  રહેશે. અગાઉ પણ ૨૦૦૦ની નોટો પાછી ખેંચાયા બાદ આવી અફવાઓ ઉડી હતી, પરંતુ સરકારે સ્પષ્ટ કર્યું છે કે હાલમાં કોઈ પણ ચલણી નોટ બંધ કરવાની કે બેંકિંગ સિસ્ટમમાંથી હટાવવાની કોઈ યોજના નથી.

સરકારે લોકોને અપીલ કરી છે કે આવી કોઈપણ આર્થિક બાબતો કે બેંકિંગ સંબંધિત માહિતી પર આંખ મીંચીને વિશ્વાસ ન કરવો જોઈએ. આ પ્રકારના ખોટા સમાચારો ફેલાવવા પાછળનો મુખ્ય હેતુ લોકોમાં અરાજકતા પેદા કરવાનો હોઈ શકે છે. ચલણી નોટોના ભાવિનો નિર્ણય લેવાનો અધિકાર માત્ર RBI અને ભારત સરકાર પાસે છે, જે હંમેશા સત્તાવાર વેબસાઇટ દ્વારા જ જાહેર કરવામાં આવે છે. નાગરિકોએ કોઈપણ મેસેજ ફોરવર્ડ કરતા પહેલા તેની સત્યતા તપાસવી જોઈએ. હાલમાં ₹500ની નોટો સુરક્ષિત છે, તેથી લોકોએ ગભરાયા વગર પોતાના નાણાકીય વ્યવહારો ચાલુ રાખવા જોઈએ.