બિહાર: પશ્ચિમ બંગાળમાં આગામી ચૂંટણીઓને લઈને રાજકીય પારો ચરમસીમાએ પહોંચ્યો છે. ભાજપના સ્ટાર પ્રચારક અને બોલિવૂડના દિગ્ગજ અભિનેતા મિથુન ચક્રવર્તીએ કૂચ બિહારની રેલીમાં સિંહગર્જના કરતા કહ્યું કે, "જ્યાં સુધી મારા શરીરમાં લોહીનું એક ટીપું પણ બાકી છે, ત્યાં સુધી પશ્ચિમ બંગાળને 'પશ્ચિમ બાંગ્લાદેશ' બનવા દઈશ નહીં." તેમણે આરોપ લગાવ્યો હતો કે રાજ્યમાં ચોક્કસ પ્રકારનું ષડયંત્ર રખાઈ રહ્યું છે, પરંતુ ભાજપના કાર્યકરો અને બંગાળની જનતા આ વિચારને ક્યારેય સફળ થવા દેશે નહીં. મિથુન દાના આ નિવેદને રાજ્યમાં નવી રાજકીય ચર્ચા છેડી દીધી છે.

મુખ્યમંત્રી મમતા બેનર્જી પર સીધો પ્રહાર કરતા મિથુન ચક્રવર્તીએ કહ્યું કે, તૃણમૂલ કોંગ્રેસના નેતાઓ બંગાળને એક અલગ દેશ સમજવાની ભૂલ કરી રહ્યા છે. તેમણે કેન્દ્રીય ગૃહમંત્રી અમિત શાહ વિરુદ્ધ મમતા બેનર્જીની ટિપ્પણીઓની સખત ટીકા કરી હતી. મિથુને યાદ અપાવ્યું કે લોકશાહીમાં કોઈ પણ નેતાને રોકવાની ધમકી આપવી એ આફતને નોતરવા સમાન છે. તેમણે ભારપૂર્વક જણાવ્યું કે બંગાળ ભારતનું અભિન્ન અંગ છે અને બંધારણથી ઉપર કોઈ નથી.

વધુમાં, મિથુન ચક્રવર્તીએ 'ધ કાશ્મીર ફાઇલ્સ' ફિલ્મનો ઉલ્લેખ કરીને ગંભીર ચેતવણી આપી હતી. તેમણે દાવો કર્યો કે જે રીતે ૧૯૯૦ના દાયકામાં કાશ્મીરમાંથી પંડિતોને હિજરત કરવી પડી હતી, તેવું જ વાતાવરણ અત્યારે બંગાળમાં ઊભું કરવાનો પ્રયાસ થઈ રહ્યો છે. ગાયિકા લગ્નજીતા ચક્રવર્તીને દેવીની સ્તુતિ કરવા બદલ થયેલી હેરાનગતિનો મુદ્દો ઉઠાવી તેમણે કહ્યું કે, બંગાળની સંસ્કૃતિ અને સુરક્ષા અત્યારે જોખમમાં છે, જેનો જવાબ જનતા આગામી ચૂંટણીમાં આપશે.

રાજ્યની કથળતી જતી હાલત પર પ્રકાશ પાડતા તેમણે કહ્યું કે, આજે બંગાળમાં ઉદ્યોગ, રોજગારી અને સ્વાસ્થ્ય સેવાઓનો સંપૂર્ણ અભાવ છે. મમતા સરકારે આયુષ્માન ભારત જેવી યોજનાઓ માત્ર રાજકીય ઈર્ષ્યાને કારણે લાગુ કરી નથી, જેનાથી ગરીબોને નુકસાન થઈ રહ્યું છે. તેમણે કોંગ્રેસ, ડાબેરીઓ અને ટીએમસીના સાચા સમર્થકોને અપીલ કરી કે જો તેઓ બંગાળને ભ્રષ્ટાચારમુક્ત જોવા માંગતા હોય, તો ભાજપને સત્તામાં લાવે. તેમણે વચન આપ્યું કે ભાજપ સરકાર બનતાની સાથે જ જનહિતની તમામ યોજનાઓ અમલમાં મૂકવામાં આવશે.