સિડની : ઓસ્ટ્રેલિયાના સિડનીમાં રવિવારથી શરૂ થનારી પાંચમી અને અંતિમ એશિઝ ટેસ્ટ મેચ પૂર્વે ક્રિકેટના મેદાન પર રમત કરતા સુરક્ષાની ચર્ચાઓ વધુ તેજ બની છે. તાજેતરમાં પ્રખ્યાત બોન્ડી બીચ પર થયેલા ભયાનક ગોળીબારમાં 15 નિર્દોષ લોકોના મોત બાદ ઓસ્ટ્રેલિયન પોલીસે સિડની ક્રિકેટ ગ્રાઉન્ડ (SCG) ને છાવણીમાં ફેરવી દેવાનો નિર્ણય લીધો છે.

બોન્ડી બીચનો એ આઘાત અને આતંકી કનેક્શન

14 ડિસેમ્બરે એક યહૂદી કાર્યક્રમ (હનુક્કાહ) દરમિયાન પિતા-પુત્રની જોડીએ અંધાધૂંધ ગોળીબાર કરીને 15 લોકોની હત્યા કરી હતી. આ હુમલા પાછળ આતંકી સંગઠન ઇસ્લામિક સ્ટેટ (ISIS) ની પ્રેરણા હોવાનું માનવામાં આવે છે. છેલ્લા ત્રણ દાયકામાં ઓસ્ટ્રેલિયામાં થયેલા આ સૌથી મોટા શૂટઆઉટ બાદ દેશમાં યહૂદી વિરોધી હિંસા વધવાનો ડર સતાવી રહ્યો છે.

મેદાન પર રાઇફલધારી જવાનોનો પહેરો

એશિઝ ટેસ્ટ જેવી હાઈ-પ્રોફાઈલ મેચમાં કોઈ પણ અનિચ્છનીય ઘટના ન બને તે માટે ન્યૂ સાઉથ વેલ્સ પોલીસે 'હાઈ-વિઝિબિલિટી' સુરક્ષા પ્લાન તૈયાર કર્યો છે. ન્યૂ સાઉથ વેલ્સ પોલીસ કમિશનર માલ લેન્યોને જણાવ્યું કે, "ચાહકો મેદાન પર રાઇફલધારી પોલીસ અધિકારીઓ, ઘોડેસવાર દળ અને હુલ્લડ નિયંત્રણ યુનિટને જોઈ શકશે. અમારો હેતુ જનતાને સુરક્ષિત રાખવાનો અને કોઈ પણ ખતરાને તાત્કાલિક ડામી દેવાનો છે."

બહાદુરોનું સન્માન અને ગાર્ડ ઓફ ઓનર

રમત શરૂ થાય તે પહેલાં ક્રિકેટ ઓસ્ટ્રેલિયા દ્વારા એક વિશેષ કાર્યક્રમ યોજવામાં આવશે. બોન્ડી બીચ હુમલા વખતે પોતાનો જીવ જોખમમાં મૂકીને બીજાને બચાવનારા 'રિયલ હીરો' અને ઈમરજન્સી સેવાઓના જવાનોને મેદાન પર 'ગાર્ડ ઓફ ઓનર' આપીને સન્માનિત કરવામાં આવશે. આખું સ્ટેડિયમ ઉભા થઈને આ બહાદુરો માટે તાળીઓ પાડશે.

ડર વચ્ચે રમતનો રોમાંચ

ઓસ્ટ્રેલિયા પહેલેથી જ એશિઝ શ્રેણી જીતી ચૂક્યું છે, પરંતુ અંતિમ ટેસ્ટમાં ક્લીન સ્વીપ કરવાના ઈરાદા સાથે મેદાનમાં ઉતરશે. નવા વર્ષની ઉજવણીમાં પણ સિડનીમાં 3,000 થી વધુ પોલીસ જવાનો તૈનાત કરવામાં આવ્યા હતા. જોકે બોન્ડી બીચ પરના કાર્યક્રમો રદ કરાયા હોવા છતાં, ક્રિકેટ ગ્રાઉન્ડ પર મોટી સંખ્યામાં ભીડ ઉમટે તેવી સંભાવના છે.