ગુવાહાટી: આસામમાં આગામી ચાર મહિનામાં વિધાનસભાની ચૂંટણીઓ યોજાવાની છે, ત્યારે મુખ્યમંત્રી હિમંત બિસ્વા શર્માની સરકારે પત્રકારો માટે 'નવા વર્ષની ભેટ' ના નામે સ્માર્ટફોન વિતરણ શરૂ કરીને રાજકીય ગરમાવો લાવી દીધો છે. રાજ્યના માહિતી અને જનસંપર્ક નિયામક (DIPR) માં નોંધાયેલા 2,200 થી વધુ પત્રકારોને સરકાર તરફથી મફત મોબાઈલ ફોન આપવાનો નિર્ણય લેવામાં આવ્યો છે.

ભેટ પરત કરીને 'કલમની ગરિમા' જાળવી

ગુવાહાટીમાં મુખ્યમંત્રીની પ્રેસ કોન્ફરન્સ દરમિયાન જ્યારે ફોનનું વિતરણ કરવામાં આવ્યું, ત્યારે બે પત્રકારોએ આ ભેટ સ્વીકારવાનો ઇનકાર કરીને સૌને ચોંકાવી દીધા હતા. 'ધ ટેલિગ્રાફ' ના ઉમાનંદ જયસ્વાલ અને 'ધ ઇકોનોમિક ટાઇમ્સ' ના વિકાસ સિંહે નૈતિકતાના ધોરણે આ સરકારી ભેટ પરત કરી દીધી છે. સોશિયલ મીડિયા પર આ પત્રકારોની નિષ્પક્ષતાના ભારોભાર વખાણ થઈ રહ્યા છે.

₹16,000 નો ફોન અને ચૂંટણીનું જોડાણ

સરકારી અધિકારીઓના જણાવ્યા મુજબ, તમામ માન્યતા પ્રાપ્ત પત્રકારોને Samsung Galaxy F17 મોડેલ આપવામાં આવી રહ્યું છે, જેની બજાર કિંમત ₹12,600 થી ₹16,000 ની વચ્ચે છે. જોકે, વિપક્ષ અને વિવેચકો આ પગલાને ચૂંટણી પહેલા મીડિયાને પ્રભાવિત કરવાનો પ્રયાસ ગણાવી રહ્યા છે. અગાઉ આ સરકાર લેપટોપ બેગ અને વોટર બોટલ જેવી વસ્તુઓ આપી ચૂકી છે, પરંતુ આ વખતે મોંઘા સ્માર્ટફોન આપવાનો નિર્ણય ચર્ચાનું કેન્દ્ર બન્યો છે.

વિદ્યાર્થીઓ અને મહિલાઓ માટે પણ તિજોરી ખોલી

માત્ર પત્રકારો જ નહીં, મુખ્યમંત્રીએ ચૂંટણી પહેલા જનતાને રીઝવવા માટે પણ મોટી જાહેરાતો કરી છે:

· બાબુ અસોની યોજના: અનુસ્નાતક વિદ્યાર્થીઓને દર મહિને ₹2,000 અને અંડરગ્રેજ્યુએટને ₹1,000 ની સહાય.

· ઓરુનોદોઈ ભેટ: ગરીબ પરિવારોની મહિલાઓને ચૂંટણીના ચાર મહિનાના હપ્તા અને બોનસ પેટે એકસાથે ₹8,000 'એડવાન્સ બિહુ ભેટ' તરીકે આપવાની જાહેરાત કરી છે.

ચૂંટણીના માહોલમાં સરકાર દ્વારા લેવાયેલા આ નિર્ણયો આસામના રાજકારણમાં કેટલો ફાયદો કરાવશે તે તો સમય જ બતાવશે, પરંતુ પત્રકારો દ્વારા ભેટ પરત કરવાની ઘટનાએ મીડિયા જગતમાં 'સ્વતંત્રતા' અને 'લોભ' વચ્ચેની રેખા દોરી દીધી છે.