નવી દિલ્હી: ભારતીય ક્રિકેટ જગતમાં અત્યારે આઈપીએલ 2026 (IPL 2026) અને બાંગ્લાદેશી ફાસ્ટ બોલર મુસ્તફિઝુર રહેમાનને લઈને વિવાદ ચરમસીમાએ છે. કોલકાતા નાઈટ રાઈડર્સ (KKR) માંથી મુસ્તફિઝુરને બહાર કરવાના BCCIના આદેશ બાદ હવે રાજકીય જગત પણ બે ભાગમાં વહેંચાઈ ગયું છે. કોંગ્રેસના સાંસદ અને ક્રિકેટ પ્રેમી શશિ થરૂરે આ મામલે મૌન તોડતા BCCI અને કેન્દ્ર સરકાર પર આકરા પ્રહારો કર્યા છે.
શશિ થરૂરે સોશિયલ મીડિયા અને મીડિયા નિવેદનો દ્વારા આશ્ચર્ય વ્યક્ત કર્યું કે શા માટે એક પ્રતિભાશાળી ખેલાડીને તેના દેશમાં ચાલી રહેલી અશાંતિ માટે સજા આપવામાં આવી રહી છે. તેમણે સવાલ ઉઠાવ્યો કે, "શું આપણે કોઈ ખેલાડીને તેના ધર્મ કે તેના દેશની સરકારની ભૂલોના કારણે મેદાનની બહાર કરી શકીએ? રમતગમત હંમેશા દેશોને જોડવાનું કામ કરે છે, તો અહીં તેને રાજકીય હથિયાર કેમ બનાવવામાં આવી રહ્યું છે?"
   અત્રે ઉલ્લેખનીય છે કે, છેલ્લા કેટલાક સમયથી બાંગ્લાદેશમાં હિન્દુ લઘુમતીઓ પર થઈ રહેલા હુમલાઓને કારણે ભારતમાં રોષ જોવા મળી રહ્યો છે. સોશિયલ મીડિયા પર ફેન્સ દ્વારા શાહરૂખ ખાનની ટીમ KKR ને ટાર્ગેટ કરવામાં આવી રહી હતી કે તેઓ બાંગ્લાદેશી ખેલાડીને ટીમમાં કેમ રાખી રહ્યા છે. વધતા દબાણને વશ થઈને BCCI એ KKR ને મુસ્તફિઝુરને રીલીઝ કરવાની સૂચના આપી હતી.
: KKR એ હજુ સુધી આ મામલે કોઈ સત્તાવાર લાંબુ નિવેદન આપ્યું નથી, પરંતુ મુસ્તફિઝુર રહેમાનને ટીમમાંથી મુક્ત કરવાની પ્રક્રિયા શરૂ કરી દેવામાં આવી છે. બીજી તરફ, બાંગ્લાદેશી ખેલાડીએ પણ આશ્ચર્ય વ્યક્ત કરતા કહ્યું હતું કે જો માત્ર દેશની સ્થિતિને કારણે ટીમમાંથી કાઢવામાં આવતા હોય તો તે દુર્ભાગ્યપૂર્ણ છે. શશિ થરૂરનું આ નિવેદન હવે સોશિયલ મીડિયા પર નવી ચર્ચા છેડી રહ્યું છે કે શું રમત અને રાજકારણને અલગ રાખવા જોઈએ કે નહીં.