હાઇકોઉ/બેઇજિંગ: ચીનના હાઇકોઉ શહેરના પૂર્વ મેયરના બંગલા પર જ્યારે તપાસ એજન્સીઓ ત્રાટકી, ત્યારે તેમને સ્વપ્ને પણ ખ્યાલ નહોતો કે તેઓ વિશ્વના સૌથી મોટા વ્યક્તિગત સોનાના ભંડારની સામે ઉભા છે. સોશિયલ મીડિયા પર લીક થયેલા ફૂટેજમાં જોઈ શકાય છે કે ઘરના ભોંયરામાં સોનાની ઇંટોના થપ્પા એવી રીતે ગોઠવાયેલા હતા જાણે કોઈ બેંકની તિજોરી હોય. ૧૩.૫ ટન સોનું અને એટલી બધી રોકડ મળી આવી કે જેની ગણતરી કરવા માટે લાવવામાં આવેલા મશીનો પણ હાંફી ગયા હતા. આટલા વિશાળ ખજાનાની કિંમત જોઈને તપાસ અધિકારીઓ પણ અવાચક રહી ગયા હતા. આ ઘટનાએ સાબિત કરી દીધું છે કે ભ્રષ્ટાચાર જ્યારે સીમા વટાવે છે ત્યારે તે અર્થતંત્ર માટે કેન્સર સમાન બની જાય છે.

તપાસના દસ્તાવેજો મુજબ, આ અધિકારીએ ૨૦૦૯ થી ૨૦૧૯ ના દાયકા દરમિયાન હાઇકોઉના રિયલ એસ્ટેટ અને ઈન્ફ્રાસ્ટ્રક્ચર સેક્ટરમાં ભીષણ લૂંટ ચલાવી હતી. દરેક સરકારી પ્રોજેક્ટ અને જમીનના સોદામાં મેયર સાહેબનો ફિક્સ હિસ્સો રહેતો હતો. ઉદ્યોગપતિઓ અને બિલ્ડરો પાસેથી તેમણે માત્ર રોકડ જ નહીં, પરંતુ સોનાની લગડીઓ સ્વરૂપે લાંચ લીધી હતી જેથી તેને છુપાવવી સરળ રહે. પરંતુ પાપનો ઘડો જ્યારે ભરાયો, ત્યારે આ જ ખજાનો તેમના માટે મોતનો સામાન બનીને આવ્યો. રેડ દરમિયાન મળેલી રોકડના બંડલો એટલા ભારે હતા કે અંતે અધિકારીઓએ ગણતરી કરવાનું માંડી વાળીને વજન કાંટાની મદદથી અંદાજિત રકમ નક્કી કરવી પડી હતી.

ચીન સરકારની ભ્રષ્ટાચાર વિરોધી ઝુંબેશ 'સ્કાઈનેટ' હેઠળ આ કાર્યવાહી કરવામાં આવી છે. ચીની કોર્ટે આ મામલાને દેશની આર્થિક સુરક્ષા સાથેની ગંભીર છેડછાડ ગણીને પૂર્વ મેયરને કોઈ પણ દયા વગર 'મૃત્યુદંડ'ની આકરી સજા ફટકારી છે. ચીનનો કાયદો કહે છે કે જો કોઈ અધિકારી જનતાના પૈસાની લૂંટ કરે, તો તેને જીવવાનો કોઈ હક નથી. આ કડક વલણ દ્વારા સી જિનપિંગ સરકાર અન્ય અધિકારીઓને સ્પષ્ટ સંદેશ આપી રહી છે કે સોનાના પહાડો પણ કાયદાના પંજાથી તમને બચાવી શકશે નહીં. આ ચુકાદા બાદ ચીનના રાજકીય વર્તુળોમાં ફફડાટ વ્યાપી ગયો છે.

વિશ્વભરમાં આ કેસની ચર્ચા "Money Overweight" (જ્યાં પૈસા તોળવા પડે છે) તરીકે થઈ રહી છે. લોકો સોશિયલ મીડિયા પર કટાક્ષ કરી રહ્યા છે કે આ મેયર પાસે એટલું સોનું હતું કે તે એક નાનો દેશ ખરીદી શકત. જોકે, હવે આ તમામ ૧૩.૫ ટન સોનું અને અબજોની રોકડ ચીનની સરકારી તિજોરીમાં જમા કરી દેવામાં આવી છે. આ કિસ્સો લાલચ અને સત્તાના નશાના વિનાશક અંજામનું સૌથી મોટું ઉદાહરણ બની ગયું છે. મેયરના આલીશાન બંગલામાંથી મળેલી 'સોનાની લંકા' હવે માત્ર એક ઈતિહાસનો પાઠ બનીને રહી ગઈ છે, જે શીખવે છે કે અનૈતિક રીતે મેળવેલો ખજાનો અંતે માત્ર પતન જ લાવે છે.