ઇસ્લામાબાદ:  પાકિસ્તાન વાયુસેનાએ ૩ જાન્યુઆરીના રોજ પોતાની નવી એર-લોન્ચ ક્રુઝ મિસાઇલ 'તૈમૂર'નું પરીક્ષણ કર્યું હતું, પરંતુ આ પરીક્ષણ સફળતા કરતાં વધુ વિવાદોમાં રહ્યું છે. પાકિસ્તાની સેનાની પ્રોપેગન્ડા વિંગ ISPR એ આ પરીક્ષણને 'ઐતિહાસિક સીમાચિહ્ન' ગણાવ્યું હતું, પરંતુ સોશિયલ મીડિયા પર વાયરલ થયેલા વીડિયોમાં મિસાઇલ તેના નિર્ધારિત લક્ષ્યને ભેદવામાં નિષ્ફળ રહી હોવાનું સ્પષ્ટ દેખાય છે. ભારત પાસે રહેલા રાફેલ વિમાનના 'સ્કેલ્પ' મિસાઇલનો તોડ કાઢવા માટે પાકિસ્તાને આ ૬૦૦ કિમીની રેન્જ ધરાવતી મિસાઇલ બનાવી હોવાનો દાવો કર્યો છે, પરંતુ હકીકતમાં મિસાઇલની સચોટતા પર ગંભીર સવાલો ઉભા થયા છે.

તકનીકી રીતે જોઈએ તો 'તૈમૂર' મિસાઇલ ૧૨૦૦ કિલોગ્રામ વજન ધરાવે છે અને તે અત્યાધુનિક જીપીએસ તથા ઇમેજિંગ ઇન્ફ્રારેડ સીકરથી સજ્જ હોવાનું કહેવાય છે. પાકિસ્તાનનો દાવો છે કે આ મિસાઇલ દુશ્મનના રડારથી બચવા માટે જમીનથી અત્યંત ઓછી ઊંચાઈએ ઉડવાની ક્ષમતા ધરાવે છે. પરીક્ષણ દરમિયાન એર ચીફ માર્શલ ઝહીર અહેમદ બાબર સિદ્ધુ અને અન્ય વૈજ્ઞાનિકો હાજર હતા. જોકે, પાકિસ્તાની નેતાઓ આસિફ અલી ઝરદારી અને શાહબાઝ શરીફ ટીમને અભિનંદન આપવામાં વ્યસ્ત હતા, ત્યારે બીજી તરફ સંરક્ષણ નિષ્ણાતોએ નોંધ્યું હતું કે મિસાઇલ અલગ તો થઈ ગઈ પણ લક્ષ્ય પર હુમલો કરવામાં સદંતર નિષ્ફળ રહી હતી.

દક્ષિણ એશિયામાં શસ્ત્રોની સ્પર્ધા તેજ બની રહી છે, કારણ કે ભારત પહેલેથી જ બ્રહ્મોસ અને પ્રલય જેવી અત્યંત સચોટ મિસાઇલોથી સજ્જ છે. પાકિસ્તાને પોતાની જેએફ-૧૭ (JF-17) અને જે-૧૦સીઈ ફાઇટર જેટ્સની તાકાત વધારવા માટે આ તૈમૂર મિસાઇલનું ઓછી કિંમતે નિર્માણ કર્યું હોવાનો દાવો કર્યો છે. પરંતુ જે રીતે સોશિયલ મીડિયા પર યુઝર્સ તેની મજાક ઉડાવી રહ્યા છે, તે જોતા એવું લાગે છે કે પાકિસ્તાનની આ 'સ્વદેશી' ક્ષમતા હજુ પણ ભારતના અત્યાધુનિક હથિયાર ભંડાર સામે ઘણી પાછળ છે. આ નિષ્ફળતા પાકિસ્તાની એરોસ્પેસ ક્ષમતા માટે એક મોટો આંચકો સાબિત થઈ શકે છે.