ગુવાહાટી: તા.05 : આસામના ઉદલગુરી જિલ્લામાંથી અત્યારે એક એવો વીડિયો સોશિયલ મીડિયા પર વાયરલ થયો છે, જેણે દેશભરમાં ચર્ચા છેડી દીધી છે. રાજ્ય સરકાર દ્વારા ગ્રામીણ વિસ્તારો માટે શરૂ કરવામાં આવેલી 'બાઇક એમ્બ્યુલન્સ' અત્યારે ઇન્ટરનેટ પર ચર્ચાનો વિષય બની છે. કેટલાક લોકો તેને પહાડી અને સાંકડા રસ્તાઓ માટે આશીર્વાદ ગણાવી રહ્યા છે, તો કેટલાક તેને માનવીય ગૌરવની વિરુદ્ધ ગણાવી રહ્યા છે.

શું છે આ બાઇક એમ્બ્યુલન્સ?

આસામ સરકારની આ પહેલનો મુખ્ય હેતુ એવા અંતરિયાળ વિસ્તારોમાં સ્વાસ્થ્ય સુવિધાઓ પહોંચાડવાનો છે જ્યાં મોટી 108 એમ્બ્યુલન્સ પહોંચી શકતી નથી. ટુ-વ્હીલર સાથે જોડાયેલ એક વિશેષ ટ્રોલી જેવી વ્યવસ્થા કરવામાં આવી છે, જેમાં દર્દીને સુવડાવી શકાય છે. અધિકારીઓના મતે, ટ્રાફિક અને કાચા રસ્તાઓ વચ્ચે આ બાઇક એમ્બ્યુલન્સ કિંમતી સમય બચાવીને દર્દીનો જીવ બચાવી શકે છે.

વિવાદ કેમ સર્જાયો?

વીડિયો વાયરલ થયા બાદ નેટીઝન્સમાં બે જૂથ પડી ગયા છે:

· સમર્થકોનું કહેવું છે: "મોડી પડતી મોટી ગાડી કરતા સમયસર પહોંચતી બાઇક સારી છે. ગરીબ અને આદિવાસી વિસ્તારો માટે આ એક ગેમ-ચેન્જર સાબિત થશે."

· વિરોધ કરનારાઓનું કહેવું છે: "દર્દીને ખુલ્લી બાઇક પર લઈ જવો એ અસંવેદનશીલ છે. આમાં દર્દીની પ્રાઈવસી (ગોપનીયતા) ક્યાં? જો રસ્તામાં અકસ્માત થાય કે વરસાદ આવે તો દર્દીની સુરક્ષાનું શું?"

સુરક્ષા અને ગરિમા સામે સવાલો

ઘણા લોકોએ આ વ્યવસ્થાને 'અમાન્ય' ગણાવી છે. ટીકાકારોનું કહેવું છે કે ગંભીર રીતે બીમાર વ્યક્તિને આ રીતે ખુલ્લામાં લઈ જવાથી તેની સ્થિતિ વધુ બગડી શકે છે. રસ્તા પરના ધૂળ-ધૂમાડા અને લોકોની નજરો વચ્ચે દર્દીનું માન જળવાતું નથી તેવી લાગણી સોશિયલ મીડિયા પર વ્યક્ત થઈ રહી છે.

આસામના સ્વાસ્થ્ય વિભાગના અધિકારીઓ દાવો કરી રહ્યા છે કે આ માત્ર 'ફર્સ્ટ રિસ્પોન્ડર' તરીકે કામ કરશે, એટલે કે દર્દીને તાત્કાલિક પ્રાથમિક સારવાર આપીને નજીકની હોસ્પિટલ પહોંચાડવામાં આવશે. જોકે, આ વિવાદ હવે સરકાર માટે આ પહેલને ચાલુ રાખવી કે તેમાં સુધારો કરવો તે અંગે મોટો પડકાર બની ગયો છે.