રોહતક: તા.05 : બળાત્કારના કેસમાં 20 વર્ષની સજા ભોગવી રહેલા ડેરા સચ્ચા સૌદાના વડા ગુરમીત રામ રહીમ સિંહને ફરી એકવાર જેલમાંથી મુક્તિ મળી છે. હરિયાણાના રોહતકની સુનારિયા જેલમાંથી તેમને સોમવારે 40 દિવસના પેરોલ પર મુક્ત કરવામાં આવ્યા છે. રામ રહીમની વારંવારની મુક્તિને લઈને સોશિયલ મીડિયા અને રાજકીય વર્તુળોમાં હંમેશા ચર્ચા જાગતી હોય છે, પરંતુ આ વખતે પણ કાનૂની જોગવાઈઓને ટાંકીને તેમને બહાર આવવાની મંજૂરી મળી છે.

શું છે પેરોલનું કારણ?

રામ રહીમના વકીલ એડવોકેટ જતિન્દર ખુરાનાએ જણાવ્યું હતું કે, આ કોઈ વિશેષ ઉપકાર નથી પરંતુ કેદીનો કાનૂની અધિકાર છે. નિયમો મુજબ, દરેક દોષિત કેદી વર્ષમાં 70 દિવસની પેરોલ અને 21 દિવસની ફર્લો મેળવવા માટે હકદાર હોય છે. રામ રહીમ આ 40 દિવસનો સમયગાળો સિરસામાં આવેલા તેમના આશ્રમમાં વિતાવશે, જ્યાં સુરક્ષાના ચુસ્ત બંદોબસ્ત ગોઠવી દેવામાં આવ્યા છે.

મુક્તિનો સિલસિલો: પાંચ વર્ષમાં અનેકવાર બહાર

રામ રહીમને સજા થયા પછી અસ્થાયી મુક્તિ મળવાનો લાંબો ઈતિહાસ રહ્યો છે:

· 2020-2021: શરૂઆતમાં 1 દિવસ અને 12 કલાકના પેરોલ મળ્યા હતા.

· 2022-2023: આ બે વર્ષમાં તેમને કુલ 51 દિવસની ફર્લો અને 70 દિવસની પેરોલ મળી હતી.

· 2024: ગત વર્ષે પણ તેઓ 50 દિવસની ફર્લો અને 20 દિવસની પેરોલ પર જેલની બહાર રહ્યા હતા.

· 2025: ચાલુ વર્ષે (જાન્યુઆરી 2026ની શરૂઆત પહેલા) આ તેમની બીજી જેલ મુક્તિ છે. 9 એપ્રિલે પણ તેમને 21 દિવસની ફર્લો મળી હતી.

કેમ જેલમાં છે રામ રહીમ?

નોંધનીય છે કે ડેરા સચ્ચા સૌદાના વડા ગુરમીત રામ રહીમ સિંહ પોતાની બે મહિલા શિષ્યો પર બળાત્કાર કરવાના ગંભીર ગુનામાં દોષિત ઠર્યા છે. સીબીઆઈની ખાસ અદાલતે તેમને 20 વર્ષની કેદની સજા ફટકારી છે અને તેઓ હાલ રોહતકની સુનારિયા જેલમાં સજા કાપી રહ્યા છે.

વારંવાર મળતી આ મુક્તિથી પીડિત પક્ષ અને માનવાધિકાર કાર્યકર્તાઓ પ્રશ્નો ઉઠાવતા રહ્યા છે, જોકે વહીવટીતંત્ર જેલ મેન્યુઅલ મુજબ જ આ પ્રક્રિયા થતી હોવાનો દાવો કરે છે.