કોલકાતા : પશ્ચિમ બંગાળના મુખ્યમંત્રી મમતા બેનર્જીએ આજે દક્ષિણ ૨૪ પરગણાના સાગર ટાપુ પરથી કેન્દ્ર સરકાર અને ચૂંટણી પંચ સામે બાયો ચઢાવી છે. મતદાર યાદીના ખાસ સઘન સંશોધન (SIR) ની પ્રક્રિયાને "અમાનવીય" ગણાવતા તેમણે જાહેરાત કરી છે કે તેઓ પોતે એક તાલીમ પામેલા વકીલ તરીકે સુપ્રીમ કોર્ટમાં જઈને આ કેસ લડશે. તેમણે આક્ષેપ કર્યો હતો કે આ પ્રક્રિયામાં થતી હેરાનગતિને કારણે ઘણા લોકોના મૃત્યુ થયા છે.

"મતદારોને હેરાન કરવાનું બંધ કરો"

એક જાહેર સભાને સંબોધતા મમતા બેનર્જીએ કહ્યું કે, "ચૂંટણી પહેલા નિયમિત પ્રક્રિયાના નામે મનસ્વી રીતે નામો કાપવામાં આવી રહ્યા છે. ગંભીર રીતે બીમાર અને વૃદ્ધોને પોતાની ઓળખ સાબિત કરવા માટે કલાકો સુધી લાઈનોમાં ઊભા રાખવામાં આવે છે. આ ભય અને ઉત્પીડનને કારણે ઘણા લોકો હોસ્પિટલમાં દાખલ થયા છે અને કેટલાકના મોત પણ થયા છે." તેમણે ભાજપના નેતાઓને સવાલ કર્યો હતો કે જો તેમના માતા-પિતાને આવી રીતે લાઈનમાં ઉભા રાખવામાં આવે તો તેમને કેવું લાગે?

"હું એક પ્રશિક્ષિત વકીલ છું"

પોતાના આક્રમક અંદાજમાં દીદીએ કહ્યું કે, "અમે આ અન્યાય સામે આવતીકાલે જ કોર્ટમાં જઈ રહ્યા છીએ. જો જરૂર પડશે તો હું પોતે સુપ્રીમ કોર્ટમાં એક સામાન્ય નાગરિક અને વકીલ તરીકે દલીલ કરીશ. વહીવટી તંત્ર દ્વારા લોકો પર જે ત્રાસ ગુજારવામાં આવી રહ્યો છે તે હું સહન નહીં કરું." તેમણે વધુમાં આરોપ લગાવ્યો કે ચૂંટણી પંચ 'વોટ્સએપ' પર સૂચનાઓ આપીને કામ કરી રહ્યું છે અને લોકોને અદ્રશ્ય કરવાનો પ્રયાસ કરી રહ્યું છે.

'લક્ષ્મી ભંડાર' અને વકફ મિલકત પર પ્રહાર

મુખ્યમંત્રીએ રાજ્યની પ્રખ્યાત 'લક્ષ્મી ભંડાર' યોજનાનો ઉલ્લેખ કરતા વિપક્ષોને ચેતવણી આપી હતી. તેમણે કહ્યું કે દિલ્હીના નેતાઓ એવું માને છે કે મહિલાઓને મતદાન કરતા રોકી શકાશે, પરંતુ બંગાળની મહિલાઓ જાણે છે કે ઘર અને રાજ્ય બંને કેવી રીતે ચલાવવા. આ ઉપરાંત, તેમણે સ્પષ્ટ કર્યું હતું કે તેઓ બંગાળમાં કોઈપણ વકફ મિલકત કબજે કરવા દેશે નહીં અને રાજ્યમાં કોઈ 'ડિટેન્શન કેમ્પ' પણ સ્થાપવામાં આવશે નહીં.

પશ્ચિમ બંગાળની આગામી વિધાનસભા ચૂંટણી પહેલા મમતા બેનર્જીનું આ 'લીગલ કાર્ડ' રાજકીય ગરમાવો વધારી રહ્યું છે. હવે જોવાનું એ રહેશે કે સુપ્રીમ કોર્ટમાં આ મામલે શું વળાંક આવે છે.