નવી દિલ્‍હી તા.૬: ભારત ચોખાના ઉત્‍પાદનમાં પડોશી દેશ ચીનને પાછળ છોડીને વિશ્વનો સૌથી મોટો ઉત્‍પાદક દેશ બન્‍યો છે. કેન્‍દ્રીય કૃષિ મંત્રી શિવરાજ સિહ ચૌહાણે કહ્યું, ભારતનું ચોખાનું ઉત્‍પાદન વધીને ૧૫૧.૮ મિલિયન ટન થયું છે, જે ચીનના ૧૪૫ મિલિયન ટન ઉત્‍પાદનને પાછળ છોડી દે છે. આ દેશ માટે એક અભૂતપૂર્વ સિદ્ધિ છે. ૨૫ પાકોની ૧૮૪ નવી જાતો બહાર પાડતી વખતે ચૌહાણે કહ્યું, દેશમાં અનાજનો ભંડાર વિપુલ પ્રમાણમાં છે, જે ભારતની ખાદ્ય સુરક્ષાને સંપૂર્ણપણે સુનિﾍતિ કરે છે. મહત્‍વનું છે કે, ભારત ખાદ્ય અછતવાળા દેશમાંથી વૈશ્વિક ખાદ્ય પ્રદાતા બન્‍યો છે અને વિદેશી બજારોમાં ચોખાનો પુરવઠો પૂરો પાડી રહ્યો છે. આનાથી વૈશ્વિક ભાવોને નિયંત્રિત કરવામાં મદદ મળી રહી છે.

એક કાર્યક્રમમાં, કૃષિ મંત્રીએ ભારતીય કૃષિ સંશોધન પરિષદ દ્વારા વિકસિત ૨૫ પ્રાદેશિક પાકોની ૧૮૪ સુધારેલી જાતોનું અનાવરણ કર્યું. તેમણે વધુમાં જણાવ્‍યું હતું કે આ ૧૮૪ સુધારેલી જાતો ખેડૂતો માટે ફાયદાકારક રહેશે કારણ કે તે વધુ ઉપજ અને સારી ગુણવત્તાનું ઉત્‍પાદન આપશે. વધુમાં, પાક ઉત્‍પાદનમાં વધારો ખેડૂતોની આવકમાં વધારો કરશે.

કૃષિ મંત્રીએ કહ્યું, દેશે ઉચ્‍ચ ઉપજ આપતા બીજ વિકસાવવામાં મોટી સફળતા મેળવી છે. ઉચ્‍ચ ઉપજ આપતા અને આબોહવા-સ્‍થિતિસ્‍થાપક બીજના વિકાસ સાથે, દેશ કૃષિ ક્રાંતિના નવા યુગમાં પ્રવેશ્‍યો છે. તેમણે મંત્રાલયના અધિકારીઓને નિર્દેશ આપ્‍યો કે આ જાતો ખેડૂતો સુધી ઝડપથી પહોંચે તેની ખાતરી કરવામાં આવે.

નરેન્‍દ્ર મોદીના નેતૃત્‍વ હેઠળની સરકારે ૧૯૬૯ થી ૨૦૧૪ દરમિયાન ફક્‍ત ૩,૯૬૯ જાતોને સૂચિત કરવામાં આવી હતી, જ્‍યારે ૩,૨૩૬ ઉચ્‍ચ ઉપજ આપતી જાતોને મંજૂરી આપી છે. ૧૯૬૯માં ગેઝેટ સૂચના પ્રક્રિયા શરૂ થઈ ત્‍યારથી કુલ ૭,૨૦૫ પાક જાતોને સૂચિત કરવામાં આવી છે, જેમાં ચોખા, ઘઉં, જુવાર, મકાઈ, કઠોળ, તેલીબિયાં અને રેસાવાળા પાકનો સમાવેશ થાય છે.(૩૮.૫)