પુણે, તા. 6 જાન્યુઆરી : પુણેના પૂર્વ સાંસદ, પૂર્વ રેલવે રાજ્યમંત્રી અને ભારતીય ઓલિમ્પિક સંઘના પૂર્વ પ્રમુખ સુરેશ કલમાડીનું ૮૧ વર્ષની વયે લાંબી બીમારી બાદ પુણેની દીનાનાથ મંગેશકર હોસ્પિટલમાં નિધન થયું છે. કોંગ્રેસના વરિષ્ઠ નેતા અને પુણેના આધુનિક વિકાસના શિલ્પી ગણાતા કલમાડી છેલ્લા ઘણા સમયથી બીમાર હતા. તેમના પાર્થિવ દેહને અંતિમ દર્શન માટે એરંડવણે સ્થિત 'કલમાડી હાઉસ' ખાતે રાખવામાં આવ્યા બાદ વૈકુંઠ સ્મશાનભૂમિ ખાતે તેમના અંતિમ સંસ્કાર કરવામાં આવ્યા હતા. તેઓ પોતાની પાછળ પત્ની, પુત્ર, બે પુત્રીઓ અને પૌત્ર-પૌત્રીઓનો પરિવાર છોડતા ગયા છે.
યુદ્ધના મેદાનથી રાજકારણ સુધીની સફર:
સુરેશ કલમાડીની કારકિર્દી બહુમુખી રહી હતી. ૧૯૬૦માં નેશનલ ડિફેન્સ એકેડમી (NDA)માં જોડાયા બાદ ૧૯૬૪માં તેઓ સૈન્યમાં કાર્યરત થયા હતા. ભારતીય વાયુસેનામાં સ્ક્વોડ્રન લીડર તરીકે તેમણે ૧૯૬૫ અને ૧૯૭૧ના પાકિસ્તાન સામેના યુદ્ધમાં સક્રિય યોગદાન આપ્યું હતું. ૧૯૭૨ થી ૧૯૭૪ દરમિયાન તેમણે NDAમાં વાયુસેના પ્રશિક્ષણ ટીમ સાથે પણ સેવા આપી હતી. ત્યારબાદ તેઓ રાજકારણમાં સક્રિય થયા અને ૧૯૮૦માં પ્રથમવાર રાજ્યસભાના સાંસદ તરીકે ચૂંટાયા હતા. તેઓ કુલ ત્રણ વખત રાજ્યસભા અને ત્રણ વખત લોકસભાના સાંસદ રહ્યા હતા.
પુણેના વિકાસના આર્કિટેક્ટ અને ખેલ જગતમાં પ્રદાન:
કોંગ્રેસના પ્રવક્તા રમેશ અય્યરે જણાવ્યું હતું કે, પુણેના વાસ્તવિક વિકાસની શરૂઆત ૧૯૯૨માં થઈ હતી જ્યારે કલમાડીએ યુવા કોર્પોરેટરોની ટીમ સાથે મળી અનેક પ્રોજેક્ટ્સ અમલી બનાવ્યા હતા. ૧૯૯૨માં પુણેમાં નેશનલ ગેમ્સનું આયોજન કરી તેમણે શહેરના ઈન્ફ્રાસ્ટ્રક્ચરને નવો વેગ આપ્યો હતો. ઉપરાંત, ૨૦૧૦ની કોમનવેલ્થ ગેમ્સના મુખ્ય આયોજક (આર્કિટેક્ટ) તરીકે પણ તેમની ઓળખ રહી છે. સાંસ્કૃતિક ક્ષેત્રે તેમણે 'પુણે ફેસ્ટિવલ' શરૂ કર્યો હતો, જે વિશ્વભરના પ્રવાસીઓને આકર્ષવામાં સફળ રહ્યો હતો.
વિવાદો અને રાજકીય ઉતાર-ચઢાવ:
૨૦૧૦ કોમનવેલ્થ ગેમ્સ કૌભાંડ બાદ ૨૦૧૧માં તેમને કોંગ્રેસ પક્ષમાંથી સસ્પેન્ડ કરવામાં આવ્યા હતા. જોકે, પક્ષના સૂત્રોના જણાવ્યા મુજબ, તેઓ મોટાભાગના કેસોમાં નિર્દોષ છૂટી ગયા હતા અને માત્ર એક જ કેસ પેન્ડિંગ હતો. આ વિવાદો બાદ તેઓ સક્રિય રાજકારણથી દૂર થઈ ગયા હતા. રાજકીય વિશ્લેષકો માને છે કે પુણેમાં કોંગ્રેસની પકડ ઢીલી પડવા પાછળ કલમાડીની સક્રિય રાજકારણમાંથી ગેરહાજરી એક મોટું કારણ રહી હતી.
તેમના નિધન પર રાજકીય નેતાઓ અને ખેલ જગતની હસ્તીઓએ ઘેરા શોકની લાગણી વ્યક્ત કરી પુણે અને ભારતીય રમતગમત ક્ષેત્રે તેમના યોગદાનને યાદ કર્યું છે.