નુયુક (ગ્રીનલેન્ડ), તા. 06 : વિશ્વના સૌથી મોટા ટાપુ ગ્રીનલેન્ડ પર અમેરિકાના સંભવિત કબજાને લઈને ચાલી રહેલી અટકળો વચ્ચે ગ્રીનલેન્ડના વડાપ્રધાન જેન્સ-ફ્રેડરિક નીલ્સને આજે મૌન તોડ્યું છે. તેમણે સ્પષ્ટ શબ્દોમાં જણાવ્યું છે કે ગ્રીનલેન્ડ પર અમેરિકાના નિકટવર્તી કબજાનો કોઈ ભય નથી. વડાપ્રધાને વિશ્વાસ વ્યક્ત કર્યો કે ગ્રીનલેન્ડની સાર્વભૌમત્વ અકબંધ છે અને તેને કોઈ પણ શક્તિ ડગાવી શકે તેમ નથી.

તાજેતરમાં વેનેઝુએલામાં અમેરિકી લશ્કરી કાર્યવાહી અને રાષ્ટ્રપતિ નિકોલસ માદુરોની અટકાયત બાદ વૈશ્વિક રાજકારણમાં ગરમાવો આવ્યો છે. આ ઘટનાના થોડા જ દિવસો બાદ અમેરિકી રાષ્ટ્રપતિ ડોનાલ્ડ ટ્રમ્પે ફરી એકવાર ગ્રીનલેન્ડમાં રસ દાખવ્યો હતો. ટ્રમ્પે ગ્રીનલેન્ડને અમેરિકાના સંરક્ષણ માટે 'વ્યૂહાત્મક રીતે અત્યંત મહત્વપૂર્ણ' ગણાવ્યું હતું, જેના કારણે આ પ્રદેશમાં સુરક્ષાને લઈને ગંભીર ચર્ચાઓ શરૂ થઈ હતી.

લોકશાહીનું મૂલ્ય અને યુરોપનો સાથ

ગ્રીનલેન્ડની રાજધાની નુયુકમાં આયોજિત એક પ્રેસ કોન્ફરન્સમાં નીલ્સને ગર્જના કરતા કહ્યું કે, "અમેરિકા ગ્રીનલેન્ડની તુલના વેનેઝુએલા સાથે કરી શકે નહીં. અમે એક મજબૂત લોકશાહી ધરાવતો દેશ છીએ." તેમણે વધુમાં ઉમેર્યું કે ગ્રીનલેન્ડ એ ડેનમાર્ક રાજ્યનો એક સ્વાયત્ત હિસ્સો છે અને તેની પાછળ ડેનમાર્ક સહિત સમગ્ર યુરોપિયન સાથી દેશો ખડતલ રીતે ઊભા છે.

વ્યૂહાત્મક મહત્વ અને વિવાદ

નોંધનીય છે કે ગ્રીનલેન્ડ તેના કુદરતી સંસાધનો અને આર્કટિક ક્ષેત્રમાં ભૌગોલિક સ્થાનને કારણે અમેરિકા માટે હંમેશા આકર્ષણનું કેન્દ્ર રહ્યું છે. જોકે, ડેનમાર્ક અને યુરોપિયન યુનિયને ચેતવણી આપી છે કે ગ્રીનલેન્ડની સાર્વભૌમત્વ સાથેની કોઈપણ છેડછાડ ગંભીર સુરક્ષા અસરો પેદા કરી શકે છે. હાલમાં, નીલ્સનના આ નિવેદને સ્થાનિક જનતા અને આંતરરાષ્ટ્રીય સમુદાયમાં એક મજબૂત સંદેશ પહોંચાડ્યો છે.