પઠાણકોટ, તા. 06 : પંજાબના સરહદી જિલ્લા પઠાણકોટમાંથી દેશની સુરક્ષાને હચમચાવી દે તેવી એક ચોંકાવનારી ઘટના સામે આવી છે. પંજાબ પોલીસે એક એવા 14 વર્ષના કિશોરની અટકાયત કરી છે, જેણે જમ્મુ અને કાશ્મીર સ્થિત ભારતીય સેનાના સંવેદનશીલ સંરક્ષણ સ્થાપનોના વીડિયો અને ફોટોગ્રાફ્સ પાકિસ્તાન સ્થિત હેન્ડલર્સને મોકલ્યા હતા. આ મામલામાં પાકિસ્તાની આર્મીના અધિકારીઓ અને કુખ્યાત ગુપ્તચર એજન્સી ISI ના એજન્ટોની સીધી સંડોવણી હોવાનું બહાર આવ્યું છે.

એક વર્ષથી ચાલતું હતું જાસૂસીનું જાળું

તપાસમાં બહાર આવ્યું છે કે આ સગીર છેલ્લા એક વર્ષથી ઓનલાઈન ચેટરૂમ દ્વારા પાકિસ્તાની હેન્ડલર્સના સતત સંપર્કમાં હતો. પઠાણકોટના વરિષ્ઠ પોલીસ અધિક્ષક (SSP) દિલજિન્દર સિંહ ધિલ્લોને આકાશવાણી સાથેની વાતચીતમાં જણાવ્યું હતું કે, પોલીસને આ કિશોરની શંકાસ્પદ પ્રવૃત્તિઓ વિશે બાતમી મળી હતી. જ્યારે તે પઠાણકોટમાં કેટલીક વધુ સંવેદનશીલ માહિતી એકત્રિત કરવાનો પ્રયાસ કરી રહ્યો હતો, ત્યારે જ તેને રંગેહાથ પકડી લેવામાં આવ્યો હતો.

ફોન ક્લોન કરીને મેળવાતી હતી માહિતી

SSP ધિલ્લોને વધુમાં એક ભયાનક ખુલાસો કરતા જણાવ્યું કે, પાકિસ્તાની હેન્ડલરોએ આ સગીરનો મોબાઈલ ફોન પણ ક્લોન કરી લીધો હતો. આનો અર્થ એ છે કે તેના ફોનની તમામ ગતિવિધિઓ પર સીધી પાકિસ્તાનથી નજર રાખવામાં આવતી હતી. પોલીસ અત્યારે એ તપાસ કરી રહી છે કે અત્યાર સુધીમાં તેણે કેટલી અને કેવી પ્રકારની ગુપ્ત માહિતી દુશ્મન દેશ સુધી પહોંચાડી છે અને તેનાથી દેશની સુરક્ષાને કેટલું નુકસાન થઈ શકે તેમ છે.

કેન્દ્રીય એજન્સીઓ એલર્ટ: અન્ય યુવાનોની શોધખોળ તેજ

આ કેસ માત્ર એક કિશોર પૂરતો મર્યાદિત નથી. પંજાબ પોલીસ અને કેન્દ્રીય સુરક્ષા એજન્સીઓ હવે પંજાબ, હરિયાણા અને જમ્મુ-કાશ્મીરમાં સક્રિય એવા અન્ય યુવાનોની પણ શોધખોળ કરી રહી છે, જેઓ કદાચ આ જાળમાં ફસાયેલા હોય. પોલીસને આશંકા છે કે પાકિસ્તાની હેન્ડલર્સ સોશિયલ મીડિયા અને ગેમિંગ એપના માધ્યમથી ભારતીય યુવાનોને લાલચ આપીને જાસૂસી કરાવી રહ્યા છે.