બેંગલુરુ, તા. 06 : કર્ણાટકના રાજકીય ઈતિહાસમાં આજે એક નવું પ્રકરણ લખાયું છે. રાજ્યના વર્તમાન મુખ્યમંત્રી સિદ્ધારમૈયાએ બુધવારે કર્ણાટકના દિગ્ગજ નેતા ડી. દેવરાજ ઉર્સનો સૌથી લાંબા સમય સુધી મુખ્યમંત્રી રહેવાનો રેકોર્ડ તોડી નાખ્યો છે. દેવરાજ ઉર્સે 7 વર્ષ અને 239 દિવસ સુધી સત્તા સંભાળી હતી, જે રેકોર્ડ અત્યાર સુધી અજેય માનવામાં આવતો હતો. સિદ્ધારમૈયા હવે રાજ્યના સૌથી વધુ સમય સુધી પદ પર રહેનારા મુખ્યમંત્રી બની ગયા છે.

બે અલગ યુગ, એક જ લક્ષ્ય: સામાજિક ન્યાય

રેકોર્ડ સિવાય પણ આ બંને નેતાઓ વચ્ચે એક અતૂટ કડી છે અને તે છે 'સામાજિક ન્યાય'. 1970ના દાયકામાં ડી. દેવરાજ ઉર્સે 'જમીન સુધારણા અધિનિયમ' દ્વારા ખેડૂતને જમીનનો માલિક બનાવીને અને પછાત વર્ગોને અનામત આપીને હલચલ મચાવી દીધી હતી. બીજી તરફ, સિદ્ધારમૈયાએ લઘુમતી, દલિત અને પછાત વર્ગોના 'અહિંદા' (AHINDA) ગઠબંધનને મજબૂત કરી મફત યોજનાઓ દ્વારા ગરીબ વર્ગમાં પોતાની પકડ જમાવી છે.

બજેટના કિંગ અને 'ભાગ્ય' યોજનાઓનો જાદુ

સિદ્ધારમૈયાએ માત્ર કાર્યકાળમાં જ નહીં, પણ બજેટ રજૂ કરવામાં પણ રેકોર્ડ બનાવ્યો છે. તેમણે ફેબ્રુઆરીમાં તેમનું 16મું બજેટ રજૂ કર્યું હતું, જેમાં 'ગૃહ લક્ષ્મી', 'ગૃહ જ્યોતિ' અને 'અન્ન ભાગ્ય' જેવી પાંચ મોટી ગેરંટી યોજનાઓ માટે ₹51,000 કરોડની ફાળવણી કરી છે. વિરોધ પક્ષો ભલે તેને તિજોરી પર બોજ ગણાવતા હોય, પણ સિદ્ધારમૈયા આ યોજનાઓને આવકનું સમાન વિતરણ ગણાવે છે.

ટીકાઓનો સામનો અને સત્તા સંઘર્ષ

ઐતિહાસિક સિદ્ધિની સાથે સિદ્ધારમૈયા વિવાદોથી પણ ઘેરાયેલા છે. ભાજપ અને જેડી(એસ) તેમના પર તુષ્ટિકરણના આરોપો લગાવી રહ્યા છે. કેન્દ્રીય મંત્રી એચ.ડી. કુમારસ્વામીએ તો ત્યાં સુધી કહી દીધું કે, "આ રેકોર્ડમાં કોઈ યોગ્યતા નથી, તે ખરાબ શાસનનું પાઠ્યપુસ્તક છે." વધુમાં, ડેપ્યુટી સીએમ ડી.કે. શિવકુમાર સાથેની 'સત્તાની વહેંચણી' (50:50 ફોર્મ્યુલા) ની ચર્ચાઓ પણ રાજકીય ગલીઓમાં ગરમાવો લાવી રહી છે.

ગામડાના ગોવાળથી મુખ્યમંત્રી સુધીની સફર

પોતાની આ સિદ્ધિ પર નમ્રતા દાખવતા 77 વર્ષીય સિદ્ધારમૈયાએ કહ્યું, "હું મૈસુરુના સિદ્ધારમનહુન્ડી ગામનો એક સામાન્ય ગોવાળ હતો. તાલુકા બોર્ડના સભ્યથી શરૂ થયેલી સફર અહીં સુધી પહોંચશે તેની ક્યારેય કલ્પના કરી નહોતી." તેમણે ઉમેર્યું કે રેકોર્ડ તો તૂટવા માટે જ હોય છે.