લખનૌ : ઉત્તર પ્રદેશમાં 2027ની વિધાનસભા ચૂંટણીને હજુ સમય છે, પરંતુ સમાજવાદી પાર્ટીના વડા અખિલેશ યાદવે અત્યારથી જ પત્તા ખેલવાનું શરૂ કરી દીધું છે. સૌથી મોટો ખળભળાટ પ્રતાપગઢની હાઈપ્રોફાઈલ બેઠક 'કુંડા' ને લઈને મચ્યો છે. સૂત્રોના જણાવ્યા અનુસાર, અખિલેશ યાદવે બાહુબલી નેતા રઘુરાજ પ્રતાપ સિંહ ઉર્ફે 'રાજા ભૈયા' સામે એક યુવા મહિલા ચહેરો, જ્યોત્સના સિંહને મેદાનમાં ઉતારવાના સ્પષ્ટ સંકેતો આપ્યા છે.

કોણ છે જ્યોત્સના સિંહ?

જ્યોત્સના સિંહ પ્રતાપગઢના એક મજબૂત રાજકીય પરિવારમાંથી આવે છે. તેમણે લખનૌની એમિટી યુનિવર્સિટીમાંથી પત્રકારત્વ (Journalism) માં સ્નાતકનો અભ્યાસ કર્યો છે. જ્યોત્સના 2016 થી સમાજવાદી પાર્ટીમાં સક્રિય છે. તેમના પિતા રાજકુમાર સિંહ સદર બેઠકના પૂર્વ બ્લોક પ્રમુખ રહી ચૂક્યા છે અને તેમની માતા હાલમાં સપા મહિલા સભા, પ્રતાપગઢના જિલ્લા પ્રમુખ છે. ખાસ વાત એ છે કે, જ્યોત્સના સિંહ સપા સાંસદ પ્રિયા સરોજની નજીકની મિત્ર ગણાય છે.

યુવા અને મહિલા કાર્ડ ખેલવાની તૈયારી

અખિલેશ યાદવ હાલમાં જિલ્લાવાર બેઠકો કરી રહ્યા છે. મંગળવારે અધિકારીઓ સાથેની બેઠકમાં તેમણે કુંડા બેઠક પર જ્યોત્સનાના નામનો ઉલ્લેખ કરીને રાજકીય ગરમાવો વધારી દીધો છે. અખિલેશનું માનવું છે કે શિક્ષિત અને યુવા મહિલા ઉમેદવાર રાજા ભૈયાના દાયકાઓ જૂના પ્રભુત્વને પડકાર આપી શકે છે. જોકે, હજુ સુધી આ અંગે સત્તાવાર જાહેરાત થઈ નથી, પણ કેમ્પસથી લઈને કોરિડોર સુધી જ્યોત્સનાના નામની ચર્ચા તેજ થઈ છે.