મુંબઈ:  મહારાષ્ટ્રના પૂર્વ મુખ્યમંત્રી અને કોંગ્રેસના દિગ્ગજ નેતા પૃથ્વીરાજ ચવ્હાણે મુંબઈમાં એક કાર્યક્રમ દરમિયાન અમેરિકી રાષ્ટ્રપતિ ડોનાલ્ડ ટ્રમ્પની કાર્યશૈલી પર કટાક્ષ કરતા વડાપ્રધાન નરેન્દ્ર મોદી સામે આઘાતજનક પ્રશ્ન પૂછ્યો હતો. ચવ્હાણે વેનેઝુએલામાં અમેરિકી એજન્ટો દ્વારા રાષ્ટ્રપતિ નિકોલસ માદુરોને તેમના બેડરૂમમાંથી ખેંચી કાઢીને ધરપકડ કરવામાં આવી હોવાનો ઉલ્લેખ કરતા કહ્યું કે, "ટ્રમ્પ અત્યારે મહત્વપૂર્ણ મુદ્દાઓ પર ભારતને આદેશો આપી રહ્યા છે, તો શું વેનેઝુએલામાં બનેલી ઘટના ભારતમાં પણ બનશે? શું ટ્રમ્પ આપણા વડાપ્રધાનનું અપહરણ કરશે?" આ નિવેદન બાદ સોશિયલ મીડિયા પર લોકોએ ચવ્હાણની આકરી ટીકા કરી છે, તો પૂર્વ પોલીસ અધિકારી એસપી વૈદે તેને સમગ્ર રાષ્ટ્ર માટે "શરમજનક" ગણાવ્યું છે.

ચવ્હાણે માત્ર આ નિવેદન પર જ અટકી ન રહેતા, અમેરિકા દ્વારા ભારત પર લાદવામાં આવેલા 50 ટકા ટેરિફ (આયાત જકાત) મુદ્દે પણ મોદી સરકારને ઘેરી હતી. તેમણે આરોપ લગાવ્યો કે અમેરિકા સીધી રીતે પ્રતિબંધો લાદી શકતું નથી, તેથી તે ટેરિફનો ઉપયોગ કરીને ભારતની નિકાસને રોકવાનો પ્રયાસ કરી રહ્યું છે. ચવ્હાણના મતે, 50 ટકા ટેરિફ સાથે વેપાર કરવો અશક્ય છે અને આનાથી ભારતીય નિકાસકારોને મળતો નફો સંપૂર્ણપણે બંધ થઈ જશે. તેમણે ચેતવણી આપી હતી કે ભારતે હવે અમેરિકાના ભરોસે રહેવાને બદલે તાત્કાલિક અન્ય વૈકલ્પિક બજારો શોધવા પડશે, અન્યથા ભારતીય અર્થતંત્રને મોટું નુકસાન વેઠવું પડી શકે છે.

આ નિવેદન બાદ ભાજપે કોંગ્રેસ પર પ્રહાર કરતા કહ્યું છે કે ભારત એક પરમાણુ સશસ્ત્ર અને શક્તિશાળી લોકશાહી દેશ છે, તેની તુલના વેનેઝુએલા જેવા અસ્થિર દેશ સાથે કરવી એ ભારતની સંપ્રભુતાનું અપમાન છે. રાજકીય વિશ્લેષકો માને છે કે ચવ્હાણનું આ નિવેદન ટ્રમ્પની આક્રમક વિદેશ નીતિ સામે ભારતની લાચારી દર્શાવવાનો પ્રયાસ હતો, પરંતુ ભાષાની પસંદગીને કારણે તેઓ પોતે જ વિવાદોમાં ઘેરાઈ ગયા છે. આગામી દિવસોમાં આ મુદ્દે સંસદથી લઈને સડક સુધી હોબાળો થવાની પૂરેપૂરી શક્યતા છે.