સોકોત્રા: યમનના દરિયાકાંઠે આવેલો અને 'ડ્રેગન બ્લડ ટ્રી' માટે વિશ્વભરમાં પ્રખ્યાત સોકોત્રા ટાપુ અત્યારે પ્રવાસીઓ માટે મુશ્કેલીનું કેન્દ્ર બન્યો છે. સાઉદી અરેબિયા અને સંયુક્ત આરબ અમીરાત  વચ્ચે વધતા જતા રાજકીય તણાવ અને સૈન્ય હિલચાલને કારણે આ ટાપુ પરનું એરપોર્ટ બંધ કરી દેવામાં આવ્યું હતું. પરિણામે, રશિયા, પોલેન્ડ, બ્રિટન અને અમેરિકા સહિતના વિવિધ દેશોના આશરે 400 થી 600 પ્રવાસીઓ અહીં ફસાઈ ગયા છે. છેલ્લા કેટલાક દિવસોથી આ પ્રવાસીઓ અનિશ્ચિતતાના ઓથાર હેઠળ જીવી રહ્યા હતા, પરંતુ તાજેતરના અહેવાલો મુજબ, 7 જાન્યુઆરી (બુધવાર) થી 'યમનિયા એરવેઝ' દ્વારા તેમને સુરક્ષિત રીતે બહાર કાઢવાની કામગીરી શરૂ કરવામાં આવશે.

આ કટોકટી ત્યારે શરૂ થઈ જ્યારે UAE એ સાઉદી અરેબિયાની ડેડલાઇન બાદ ટાપુ પરથી પોતાની પકડ ગુમાવી અને ફ્લાઇટ્સ અચાનક રદ કરવામાં આવી. ટાપુ પર ફસાયેલા પ્રવાસીઓ માટે સૌથી મોટો પડકાર રોકડ રકમની અછત છે. સોકોત્રામાં એટીએમ (ATM) કે કાર્ડ પેમેન્ટની સુવિધા ઉપલબ્ધ નથી, જેના કારણે ઘણા પ્રવાસીઓ પાસે હવે ભોજન અને રહેઠાણ માટેના પૈસા પણ ખૂટી રહ્યા છે. પોલિશ અને લિથુનિયન પ્રવાસીઓએ મીડિયા સમક્ષ પોતાની વ્યથા ઠાલવતા જણાવ્યું હતું કે તેઓ માત્ર હવે વહેલી તકે પોતાના ઘરે પરત ફરવા માંગે છે. સ્થાનિક હોટલો અને કેમ્પ સાઇટ્સ પર પ્રવાસીઓનો જમાવડો જોવા મળી રહ્યો છે.

રાજદ્વારી સ્તરે પણ આ મામલે ભારે હિલચાલ જોવા મળી રહી છે. અમેરિકા, રશિયા અને પોલેન્ડ જેવા દેશોના દૂતાવાસો સાઉદી અને યમન સરકાર સાથે સતત સંપર્કમાં છે. એરપોર્ટ અધિકારીઓના જણાવ્યા અનુસાર, પ્રવાસીઓને સીધા અબુ ધાબી મોકલવાને બદલે પહેલા યમનના મુખ્ય શહેર એડન અને ત્યાંથી સાઉદી અરેબિયાના જેદ્દાહ શહેર ખાતે ખસેડવામાં આવશે. રશિયન એમ્બેસીએ સોકોત્રાથી જેદ્દાહની ફ્લાઇટ માટે અંદાજે $700 (આશરે ₹58,000) ના ભાડાની વિગતો પણ જાહેર કરી છે, જેથી ફસાયેલા નાગરિકો જલ્દીથી ટાપુ છોડી શકે.

નિષ્ણાતોનું માનવું છે કે સોકોત્રા ટાપુ તેની ભૌગોલિક સ્થિતિને કારણે વ્યૂહાત્મક રીતે અત્યંત મહત્વનો છે, જેને કારણે તે સાઉદી અને યુએઈ વચ્ચેના 'પાવર સ્ટ્રગલ'નો ભોગ બન્યો છે. ટાપુ પર હાજર પ્રવાસીઓ માટે આ વેકેશન એક દુઃસ્વપ્ન સમાન સાબિત થયું છે. જોકે, એરપોર્ટ ફરી ખુલવાની જાહેરાતથી પ્રવાસીઓમાં થોડો રાહતનો શ્વાસ જોવા મળ્યો છે. હવે જોવાનું એ રહેશે કે સુરક્ષાની સ્થિતિ કેટલી ઝડપથી સામાન્ય થાય છે અને તમામ પ્રવાસીઓ ક્યારે પોતાના વતન પરત ફરી શકે છે.