નવી દિલ્હી : અમેરિકામાં ઉચ્ચ અભ્યાસના સપના જોતા ભારતીય વિદ્યાર્થીઓ માટે યુએસ દૂતાવાસે એક ગંભીર ચેતવણી જાહેર કરી છે. સોશિયલ મીડિયા પ્લેટફોર્મ X (અગાઉ ટ્વિટર) પર એક સત્તાવાર પોસ્ટ દ્વારા દૂતાવાસે સ્પષ્ટ શબ્દોમાં જણાવ્યું છે કે, યુનાઈટેડ સ્ટેટ્સમાં પ્રવેશ મેળવવો એ કોઈ હકદારી (Entitlement) નથી, પરંતુ એક વિશેષાધિકાર (Privilege) છે. જો કોઈ પણ વિદ્યાર્થી સ્થાનિક કાયદાઓ કે વિઝાના નિયમોનું ઉલ્લંઘન કરતા પકડાશે, તો તેને ગંભીર પરિણામો ભોગવવા પડશે.

દૂતાવાસે પોતાની પોસ્ટમાં ભાર મૂકતા લખ્યું છે કે, "અમેરિકાના કાયદાનો ભંગ કરવાથી તમારા વિદ્યાર્થી વિઝા તાત્કાલિક રદ થઈ શકે છે. જો કોઈ વિદ્યાર્થીની ધરપકડ કરવામાં આવે અથવા તે કોઈ કાનૂની વિવાદમાં ફસાય, તો તેને દેશનિકાલ (Deport) કરવામાં આવશે એટલું જ નહીં, પણ તે ભવિષ્યમાં ક્યારેય પણ યુએસ વિઝા મેળવવા માટે લાયક રહેશે નહીં." આ સલાહકારી ખાસ કરીને એવા સમયે આવી છે જ્યારે ડોનાલ્ડ ટ્રમ્પ વહીવટીતંત્ર હેઠળ ઇમિગ્રેશનના નિયમો અને સુરક્ષા ચકાસણી અત્યંત કડક બનાવવામાં આવી છે.

ટ્રમ્પ સરકારના નવા નિયમો અનુસાર, સોશિયલ મીડિયા સ્ક્રીનિંગ અને બેકગ્રાઉન્ડ ચેકને વધુ મજબૂત બનાવવામાં આવ્યા છે. વિરોધ પ્રદર્શનોમાં સામેલ થવા અથવા અયોગ્ય પ્રવૃત્તિઓમાં જોડાવા બદલ વિઝા રદ કરવાનો અવકાશ પણ વિસ્તૃત કરવામાં આવ્યો છે. H-1B વિઝા અને વિદ્યાર્થીઓના રહેઠાણના સમયગાળા (Stay period) પર પણ નવી મર્યાદાઓ લાદવાની તૈયારીઓ ચાલી રહી છે. દૂતાવાસે વિદ્યાર્થીઓને વિનંતી કરી છે કે તેઓ ત્યાંના તમામ સ્થાનિક નિયમોનું ચુસ્તપણે પાલન કરે અને પોતાની શૈક્ષણિક મુસાફરીને જોખમમાં ન નાખે.