નવી દિલ્હી: ભારતની પ્રીમિયર તપાસ એજન્સી CBI એ વિદેશમાં છુપાયેલા ગુનેગારો સામેના જંગમાં વધુ એક મોટી સફળતા હાંસલ કરી છે. લોરેન્સ બિશ્નોઈ ગેંગના અત્યંત કુખ્યાત અને સક્રિય સભ્ય અમન ઉર્ફે અમન ભૈંસવાલને અમેરિકાથી ભારત પરત લાવવામાં (Deport) સફળતા મળી છે. બુધવારે સાંજે જ્યારે અમન દિલ્હી એરપોર્ટ પર ઉતર્યો, ત્યારે પહેલેથી જ હાજર હરિયાણા પોલીસની ટીમે તેને કસ્ટડીમાં લઈ લીધો હતો. આ ઓપરેશન CBI, વિદેશ મંત્રાલય અને ગૃહ મંત્રાલયના સંયુક્ત સંકલનનું પરિણામ છે.

અમન ભૈંસવાલ હરિયાણામાં હત્યા, રમખાણો ફેલાવવા અને ગંભીર ગુનાહિત કાવતરાં રચવા જેવા અનેક કેસોમાં વોન્ટેડ હતો. તે લોરેન્સ બિશ્નોઈ ગેંગનો એક મુખ્ય મોહરો માનવામાં આવે છે. અગાઉ ભારતમાં તેની ધરપકડ થઈ હતી, પરંતુ જામીન મળ્યા બાદ તે કાયદાની આંખમાં ધૂળ નાખીને અમેરિકા ફરાર થઈ ગયો હતો. ભારતમાંથી ભાગી ગયા બાદ પણ તે ગેંગ સાથે જોડાયેલો હોવાની આશંકા હતી, જેના કારણે સુરક્ષા એજન્સીઓ સતત તેની પાછળ પડી હતી.

ભાગેડુ અમનને પકડવા માટે હરિયાણા પોલીસની વિનંતી પર CBI એ ઇન્ટરપોલ દ્વારા 'રેડ નોટિસ' (Red Notice) જાહેર કરાવી હતી. આ નોટિસના આધારે જ અમેરિકન એજન્સીઓએ તેને ટ્રેસ કર્યો અને ભારતને સોંપવાની પ્રક્રિયા તેજ કરી. અમનની ધરપકડથી બિશ્નોઈ ગેંગના વિદેશી નેટવર્ક અને ભારતમાં ચાલી રહેલી તેની ગુનાહિત પ્રવૃત્તિઓ અંગે ઘણા મોટા ખુલાસા થવાની શક્યતા છે. હરિયાણા પોલીસ હવે અમનને રિમાન્ડ પર લઈને ગેંગના અન્ય સભ્યો વિશે પૂછપરછ કરશે.