મુંબઈ : વર્ષ ૨૦૨૫ એ ભારતીય રમતગમતના ઈતિહાસમાં સુવર્ણ અક્ષરે લખાઈ ગયું છે. એક જ વર્ષમાં ભારતની મેન્સ ટીમ, વિમેન્સ ટીમ અને બ્લાઈન્ડ ક્રિકેટ ટીમ - આ ત્રણેય ટીમોએ વિશ્વ વિજેતા બનીને દુનિયાને બતાવી દીધું છે કે ભારત હવે માત્ર આર્થિક વિકાસમાં જ નહીં, પરંતુ મેદાન પર પણ સર્વોપરી છે. આ ઐતિહાસિક સિદ્ધિ પર સદીના મહાનાયક અમિતાભ બચ્ચને અત્યંત ભાવુક અને ગૌરવપૂર્ણ પ્રતિક્રિયા આપી છે.

પોતાના તાજેતરના બ્લોગમાં અમિતાભ બચ્ચને લખ્યું કે, "ત્રણેય ટીમોનું એકસાથે વિશ્વ ચેમ્પિયન બનવું એ માત્ર રમતની જીત નથી, પણ રાષ્ટ્રની સામર્થ્યનું પ્રતીક છે. ભારતને ઘણીવાર 'થર્ડ વર્લ્ડ' (ત્રીજી દુનિયા) નો દેશ કહીને ગણવામાં આવતો હતો, પરંતુ આ ખેલાડીઓની મહેનતે સાબિત કર્યું છે કે આપણે હવે 'ફર્સ્ટ વર્લ્ડ નેશન' છીએ." તેમણે વધુમાં ઉમેર્યું કે ભારત હવે પ્રતિભા અને કૌશલ્યના મામલે વૈશ્વિક નેતા તરીકે ઉભરી આવ્યું છે.

વર્કફ્રન્ટની વાત કરીએ તો, બિગ બી હાલમાં તેમની આગામી મહત્વાકાંક્ષી ફિલ્મ "કલ્કી પાર્ટ ૨" ને લઈને ચર્ચામાં છે. ૨૦૨૪ની બ્લોકબસ્ટર ફિલ્મ "કલ્કી ૨૮૯૮ એડી" માં અશ્વત્થામા તરીકે અમર પાત્ર ભજવ્યા બાદ ચાહકો ફરી એકવાર તેમને પ્રભાસ, દીપિકા પાદુકોણ અને કમલ હાસન સાથે મોટા પડદા પર જોવા માટે આતુર છે. દેશની આ રમતગમતની જીતને અમિતાભ બચ્ચને પોતાની ફિલ્મોની સફળતાથી પણ વિશેષ ગણાવી છે.