નવી દિલ્હી: ન્યૂયોર્ક શહેરના નવા વરાયેલા મેયર ઝોહરાન મમદાની દ્વારા ભારતીય જેલમાં બંધ કાર્યકર્તા ઉમર ખાલિદને લખવામાં આવેલા પત્રને લઈને આંતરરાષ્ટ્રીય સ્તરે રાજદ્વારી ગરમાવો આવ્યો છે. ભારતના વિદેશ મંત્રાલયે આજે આ મામલે અત્યંત તીખો પ્રતિભાવ આપતા જણાવ્યું છે કે, અન્ય લોકશાહી દેશોના જનપ્રતિનિધિઓએ બીજા દેશના ન્યાયતંત્રની સ્વતંત્રતાનો આદર કરવો જોઈએ.
શું હતો વિવાદિત પત્ર?
ન્યૂયોર્કના મેયર ઝોહરાન મમદાનીએ ઉમર ખાલિદના માતા-પિતા સાથેની મુલાકાત બાદ એક હસ્તલિખિત પત્ર લખ્યો હતો, જેમાં તેમણે ખાલિદ સાથે એકતા વ્યક્ત કરી હતી. મમદાનીએ લખ્યું હતું કે, "પ્રિય ઉમર, હું કડવાશને તમારા પર હાવી ન થવા દેવાના તમારા વિચારોને વારંવાર યાદ કરું છું. અમે બધા તમારા વિશે વિચારી રહ્યા છીએ." આ પત્રનો ફોટો સોશિયલ મીડિયા પર વાયરલ થતા જ વિવાદ વકર્યો હતો.
ભારતનો સણસણતો જવાબ
વિદેશ મંત્રાલયના પ્રવક્તા રણધીર જયસ્વાલે એક પ્રેસ બ્રીફિંગમાં જણાવ્યું હતું કે, "અમે અપેક્ષા રાખીએ છીએ કે લોકશાહી દેશોના પ્રતિનિધિઓ અન્ય દેશોની ન્યાયિક પ્રક્રિયાનું સન્માન કરે. વ્યક્તિગત પૂર્વગ્રહો વ્યક્ત કરવા તે જવાબદાર પદ પર રહેલા વ્યક્તિ માટે યોગ્ય નથી. તેમને સોંપવામાં આવેલી જવાબદારીઓ પર ધ્યાન કેન્દ્રિત કરવું તેમના માટે વધુ સારું રહેશે."
સુપ્રીમ કોર્ટનું કડક વલણ
આ ઘટનાક્રમ એવા સમયે આવ્યો છે જ્યારે ૫ જાન્યુઆરીના રોજ સુપ્રીમ કોર્ટે ૨૦૨૦ના દિલ્હી રમખાણોના કાવતરાના કેસમાં ઉમર ખાલિદ અને શર્જીલ ઈમામને જામીન આપવાનો સાફ ઈનકાર કરી દીધો છે. કોર્ટે અવલોકન કર્યું હતું કે UAPA હેઠળ તેમની સામે પ્રથમ દૃષ્ટિએ કેસ બને છે. જોકે, કોર્ટે આ જ કેસમાં અન્ય પાંચ આરોપીઓને જામીન આપ્યા છે, પરંતુ ઉમર ખાલિદને 'માસ્ટરમાઈન્ડ' હોવાના આરોપસર કોઈ રાહત મળી નથી.
ભારતના આ કડક વલણથી સ્પષ્ટ થાય છે કે દેશના આંતરિક અને ન્યાયિક મામલાઓમાં વિદેશી હસ્તક્ષેપને ભારત સહેજ પણ ચલાવી લેવા માંગતું નથી.