સિરમૌર: હિમાચલ પ્રદેશના સિરમૌર જિલ્લામાં શુક્રવારનો દિવસ અત્યંત ગોઝારો સાબિત થયો છે. બપોરે લગભગ 3 વાગ્યાના સુમારે સંગ્રાહ સબડિવિઝનના હરિપુરધાર નજીક 'જીત કોચ' નામની એક ખાનગી બસ અચાનક અનિયંત્રિત થઈને ઊંડી ખીણમાં ખાબકી હતી. આ ભયાનક અકસ્માતમાં અત્યાર સુધીમાં 8 લોકોએ જીવ ગુમાવ્યા હોવાના અહેવાલ છે, જ્યારે એક ડઝનથી વધુ મુસાફરો લોહીલુહાણ હાલતમાં ગંભીર રીતે ઘાયલ થયા છે. પ્રત્યક્ષદર્શીઓના જણાવ્યા અનુસાર, બસ હરિપુરધાર બજારથી થોડે જ દૂર પહોંચી હતી અને વળાંક પર ડ્રાઈવરે સ્ટેયરિંગ પરથી કાબૂ ગુમાવતા બસ સીધી પહાડ નીચે મોતની ખાઈમાં જઈ પડી હતી.

અકસ્માતની જાણ થતા જ સ્થાનિક ગ્રામજનો અને વહીવટીતંત્ર ઘટનાસ્થળે દોડી ગયા હતા. ખીણ અત્યંત ઊંડી હોવાના કારણે બચાવ કામગીરીમાં ભારે મુશ્કેલીઓનો સામનો કરવો પડી રહ્યો છે. પોલીસ અધિક્ષક એન.એસ. નેગી અને એડિશનલ એસપી યોગેશ રોલ્ટાની આગેવાનીમાં સંગ્રાહ, રાજગઢ અને દાદાહુથી પોલીસની ટુકડીઓ રાહત કાર્ય માટે પહોંચી ગઈ છે. અત્યાર સુધીમાં ખીણમાંથી પાંચ મૃતદેહો બહાર કાઢવામાં આવ્યા છે, જ્યારે અન્યની શોધખોળ હજુ ચાલુ છે. ઘાયલોને તાત્કાલિક નજીકની હોસ્પિટલોમાં ખસેડવામાં આવ્યા છે, જેમાંથી ઘણાની હાલત અત્યંત નાજુક હોવાનું જાણવા મળ્યું છે.

કુપવીથી શિમલા તરફ જતી આ બસમાં ત્રણ ડઝનથી વધુ મુસાફરો સવાર હતા, જેના કારણે વહીવટીતંત્રને ડર છે કે મૃત્યુઆંક હજુ પણ વધી શકે છે. પહાડી વિસ્તારોમાં શિયાળા દરમિયાન ધુમ્મસ અથવા ટેકનિકલ ખામીને કારણે આવા અકસ્માતોની ઘટનાઓ વધી જતી હોય છે. હાલ પોલીસ મૃતકોની ઓળખ કરવાની તજવીજ હાથ ધરી રહી છે અને અકસ્માતનું ચોક્કસ કારણ જાણવા તપાસ શરૂ કરી છે. આ કરુણ ઘટનાને પગલે સમગ્ર હિમાચલ પ્રદેશમાં શોકનું મોજું ફરી વળ્યું છે અને સ્થાનિક લોકોમાં ખાનગી બસોની સુરક્ષાને લઈને રોષ પણ જોવા મળી રહ્યો છે.