નવી દિલ્હી : ભારતના આર્થિક ભવિષ્યનો રોડમેપ તૈયાર કરતું 'બજેટ સત્ર' આગામી ૨૮ જાન્યુઆરીથી શરૂ થવા જઈ રહ્યું છે. સંસદીય બાબતોની કેબિનેટ સમિતિ દ્વારા તૈયાર કરવામાં આવેલા કામચલાઉ સમયપત્રક મુજબ, નાણામંત્રી નિર્મલા સીતારમણ ૧ ફેબ્રુઆરીના રોજ કેન્દ્રીય બજેટ રજૂ કરશે. આ વર્ષે ખાસ વાત એ છે કે ૧ ફેબ્રુઆરીએ રવિવાર હોવા છતાં, બજેટ રજૂ કરવાની પરંપરા જાળવી રાખવા માટે સંસદની કાર્યવાહી ચાલુ રહેશે.
રાષ્ટ્રપતિના સંબોધનથી મંગલારંભ
સત્રના પ્રથમ દિવસે એટલે કે ૨૮ જાન્યુઆરીએ રાષ્ટ્રપતિ દ્રૌપદી મુર્મુ સંસદના બંને ગૃહોની સંયુક્ત બેઠકને સંબોધિત કરશે. આ સંબોધનમાં સરકારની આગામી વર્ષની નીતિઓ અને સિદ્ધિઓની ઝલક જોવા મળશે. ત્યારબાદ ૨૯ જાન્યુઆરીએ 'બીટિંગ રીટ્રીટ' સમારોહ હોવાને કારણે સંસદના બંને ગૃહોમાં રજા રહેશે અને કોઈ બેઠક મળશે નહીં.
આર્થિક સર્વેક્ષણ અને બજેટની તારીખો
૩૦ જાન્યુઆરીએ સરકાર દેશનું 'આર્થિક સર્વેક્ષણ' (Economic Survey) રજૂ કરશે, જે દેશની વર્તમાન આર્થિક સ્થિતિનો ચિતાર આપશે. ૩૧ જાન્યુઆરીએ શનિવાર હોવાથી રજા રહેશે અને ૧ ફેબ્રુઆરીએ બહુપ્રતિક્ષિત કેન્દ્રીય બજેટ રજૂ કરવામાં આવશે. બજેટ રજૂ થયા બાદ વિવિધ મંત્રાલયોની ગ્રાન્ટની માંગણીઓની તપાસ માટે ૧૩ ફેબ્રુઆરીથી સંસદમાં લગભગ એક મહિનાનો વિરામ (રજા) રહેશે.
બે તબક્કામાં ચાલશે સત્ર
બજેટ સત્રનો બીજો તબક્કો ૯ માર્ચથી ફરી શરૂ થશે. આ દરમિયાન બજેટ પર ચર્ચાઓ અને વિધેયકો પસાર કરવાની પ્રક્રિયા હાથ ધરવામાં આવશે. આ સત્ર ૨ એપ્રિલ, ગુરુવારના રોજ સમાપ્ત થવાની શક્યતા છે. સામાન્ય રીતે સત્ર શુક્રવારે પૂર્ણ થતું હોય છે, પરંતુ ૩ એપ્રિલે 'ગુડ ફ્રાઈડે'ની જાહેર રજા હોવાથી સત્ર એક દિવસ વહેલું એટલે કે ૨ એપ્રિલે આટોપી લેવામાં આવશે. આ બજેટમાં મધ્યમ વર્ગને ટેક્સમાં રાહત મળશે કે કેમ, તેના પર આખા દેશની નજર ટકેલી છે.