ચેન્નઈ : ભારતીય ટેક ઉદ્યોગના પોસ્ટર બોય ગણાતા અને 'ઝોહો' (Zoho) ના માલિક શ્રીધર વેમ્બુ અત્યારે પોતાની અંગત જિંદગીના સૌથી મુશ્કેલ તબક્કામાંથી પસાર થઈ રહ્યા છે. કેલિફોર્નિયાની એક અદાલતે એક અભૂતપૂર્વ ચુકાદામાં વેમ્બુને તેમની પત્ની પ્રમિલા શ્રીનિવાસન સાથેના છૂટાછેડાના કેસમાં ૧.૭ બિલિયન ડોલર (આશરે રૂ. ૧૫,૨૭૮ કરોડ) નો બોન્ડ જમા કરાવવાનો આદેશ આપ્યો છે. આ આદેશ પત્નીના હિતોનું રક્ષણ કરવા માટે આપવામાં આવ્યો છે.
શું છે વિવાદનું મૂળ?
વેમ્બુ અને પ્રમિલાના લગ્ન ૧૯૯૩માં થયા હતા અને તેઓ ત્રણ દાયકા સુધી અમેરિકામાં રહ્યા હતા. વિવાદ ત્યારે શરૂ થયો જ્યારે ૨૦૧૯માં શ્રીધર વેમ્બુ ભારત પરત ફર્યા અને તમિલનાડુના એક ગામડામાંથી કંપની ચલાવવાનું શરૂ કર્યું. પ્રમિલાએ આરોપ લગાવ્યો છે કે વેમ્બુએ તેમને અને તેમના ૨૬ વર્ષના ઓટિસ્ટિક પુત્રને તરછોડી દીધા છે. કેલિફોર્નિયાના કાયદા મુજબ, લગ્ન દરમિયાન ઉભી થયેલી સંપત્તિ પર બંનેનો સમાન અધિકાર હોય છે, પરંતુ પ્રમિલાનો દાવો છે કે વેમ્બુએ તેમની જાણ બહાર ઝોહોના શેર પોતાની બહેન રાધા અને ભાઈ સેકરના નામે ટ્રાન્સફર કરી દીધા છે.
શેર હોલ્ડિંગનું ગણિત અને આરોપો
હાલમાં રાધા વેમ્બુ પાસે કંપનીનો ૪૭.૮% અને સેકર પાસે ૩૫.૨% હિસ્સો છે, જ્યારે સ્થાપક હોવા છતાં શ્રીધર વેમ્બુ પાસે માત્ર ૫% શેર જ હોવાનું દર્શાવાયું છે. પ્રમિલાના વકીલોનું કહેવું છે કે આ એક સુનિયોજિત કાવતરું છે જેથી છૂટાછેડા વખતે સંપત્તિના ભાગ ન પાડવા પડે. કોર્ટે પણ નોંધ્યું છે કે વેમ્બુ નાણાકીય વ્યવહારોમાં પારદર્શક નથી રહ્યા અને 'કાયદાને ધ્યાનમાં લીધા વિના' કાર્ય કર્યું છે.
વકીલનો બચાવ: "ન્યાયાધીશને ગેરમાર્ગે દોરવામાં આવ્યા છે"
બીજી તરફ, શ્રીધર વેમ્બુના વકીલ ક્રિસ્ટોફર મેલ્ચરે આ આરોપોને પાયાવિહોણા ગણાવ્યા છે. તેમણે સોશિયલ મીડિયા પર દાવો કર્યો છે કે વેમ્બુએ તેમની પત્નીને પોતાના હિસ્સાના ૫૦% શેર અને પારિવારિક ઘર પહેલેથી જ ઓફર કર્યું છે, પરંતુ પ્રમિલા વધુ પૈસા પડાવવા અને વેમ્બુને બદનામ કરવા માટે આ કાનૂની જંગ ખેલી રહી છે. વકીલના મતે ૧૫,૦૦૦ કરોડનો બોન્ડ ઓર્ડર અમાન્ય છે અને તેની સામે અપીલ કરવામાં આવશે.
ભારતના 'સ્વદેશી' સોફ્ટવેર કિંગ ગણાતા વેમ્બુ માટે ૨૦૨૬નું વર્ષ વ્યવસાયિક રીતે જેટલું સફળ રહ્યું છે, તેટલું જ કાનૂની રીતે પડકારજનક સાબિત થઈ રહ્યું છે. આ કેસના પરિણામો માત્ર વેમ્બુ પરિવાર જ નહીં, પરંતુ ઝોહો કોર્પોરેશનના ભવિષ્ય પર પણ અસર કરી શકે છે.