કોલકાતા: પશ્ચિમ બંગાળમાં EDના દરોડા બાદ રાજકીય સંગ્રામ હવે અત્યંત સ્ફોટક વળાંક પર પહોંચી ગયો છે. કોલકાતાના રસ્તાઓ પર હજારો સમર્થકોની ગર્જના વચ્ચે મુખ્યમંત્રી મમતા બેનર્જીએ કેન્દ્રીય ગૃહમંત્રી અમિત શાહ પર અત્યાર સુધીનો સૌથી મોટો અને સીધો હુમલો કર્યો છે. મમતાએ જાહેરમાં દાવો કર્યો છે કે તેમની પાસે એક એવી 'પેન ડ્રાઈવ' છે જેમાં કોલસા કૌભાંડના નાણાં ભાજપના ટોચના નેતાઓ સુધી પહોંચ્યા હોવાના નક્કર પુરાવા છે. તેમણે કેન્દ્ર સરકારને પડકાર ફેંકતા કહ્યું કે, "હું બંધારણીય પદ પર હોવાથી મર્યાદા જાળવી રહી છું, પણ જો મને વધુ હેરાન કરવામાં આવી તો આ પેન ડ્રાઈવના રહસ્યો આખા દેશને હચમચાવી દેશે."

I-PAC પર થયેલા EDના દરોડાને મમતાએ રાજકીય બદલો ગણાવતા કહ્યું કે કેન્દ્રીય એજન્સીઓ તેમની ચૂંટણી રણનીતિ ચોરવાનો પ્રયાસ કરી રહી છે. મમતાએ ભાજપના નેતા સુવેન્દુ અધિકારી અને સાંસદ જગન્નાથ સરકારનું નામ લઈને વળતો પ્રહાર કર્યો કે કોલસાની દાણચોરી રોકવાની જવાબદારી BSF અને CISFની છે, તો પછી ઠીકરું રાજ્ય સરકાર પર કેમ ફોડવામાં આવે છે? તેમણે આરોપ લગાવ્યો કે કૌભાંડની રકમ સીધી રીતે કેન્દ્રીય નેતૃત્વ સુધી પહોંચી રહી છે. જોકે, આ દરમિયાન મુખ્યમંત્રીની સાથે વરિષ્ઠ IAS અને IPS અધિકારીઓની હાજરી પર વિપક્ષે સવાલો ઉઠાવ્યા છે કે પક્ષના કામમાં સરકારી તંત્રનો ઉપયોગ કેમ થઈ રહ્યો છે.

આ હાઈ-વોલ્ટેજ ડ્રામા બાદ બંગાળમાં 'લક્ષ્મણ રેખા' ઓળંગવાની વાત હવે દિલ્હી સુધી પહોંચી છે. મમતા બેનર્જીએ સ્પષ્ટ સંકેત આપ્યા છે કે તેઓ હવે સંરક્ષણાત્મક નહીં પણ આક્રમક મૂડમાં છે. "જો હું મોઢું ખોલીશ તો આખી દુનિયામાં હોબાળો મચી જશે" - મમતાના આ વાક્યએ ભાજપ ખેમામાં પણ ચર્ચાઓ તેજ કરી દીધી છે. હવે જોવાનું એ રહેશે કે મમતા ખરેખર પેન ડ્રાઈવમાં રહેલા કથિત પુરાવા જાહેર કરે છે કે પછી આ માત્ર તપાસ એજન્સીઓ પર દબાણ લાવવાનો એક દાવ છે. એક વાત તો નક્કી છે કે 14 જાન્યુઆરીએ હાઈકોર્ટમાં થનારી સુનાવણી પહેલા બંગાળનું રાજકારણ કોઈ મોટા ધડાકાની રાહ જોઈ રહ્યું છે.