ન્યૂયોર્ક : વિશ્વના સૌથી પ્રભાવશાળી અને સ્ટાઇલિશ પરિવારોમાંના એક ગણાતા 'બેકહામ ફેમિલી'માં અત્યારે મોટું મહાભારત સર્જાયું છે. દિગ્ગજ ફૂટબોલર ડેવિડ બેકહામ અને ફેશન આઇકોન વિક્ટોરિયા બેકહામના સૌથી મોટા પુત્ર બ્રુકલિન બેકહામે તેના જ માતા-પિતા સામે કાનૂની મોરચો માંડ્યો છે. બ્રુકલિને તેના માતા-પિતાને સત્તાવાર કાનૂની નોટિસ મોકલીને સ્પષ્ટ શબ્દોમાં જણાવી દીધું છે કે હવેથી કોઈપણ વાતચીત સીધી નહીં, પરંતુ માત્ર વકીલો મારફતે જ કરવામાં આવે.
પત્ની નિકોલા સાથેના વિવાદે પકડ્યું જોર
સૂત્રોના જણાવ્યા અનુસાર, આ કૌટુંબિક કલેશનું મુખ્ય કારણ બ્રુકલિનની પત્ની નિકોલા પેલ્ટ્ઝ અને વિક્ટોરિયા બેકહામ વચ્ચેનો ગજગ્રાહ હોવાનું મનાય છે. લાંબા સમયથી ચાલી રહેલા આ અણબનાવને સુધારવા માટે વિક્ટોરિયાએ સોશિયલ મીડિયા પર અનેક હકારાત્મક પ્રયાસો કર્યા હતા, પરંતુ બ્રુકલિને આ તમામ પ્રયાસોને ફગાવી દીધા છે. હદ તો ત્યારે થઈ જ્યારે બ્રુકલિને સોશિયલ મીડિયા પર તેના માતા-પિતા અને ભાઈ-બહેનોને બ્લોક કરી દીધા.
સોશિયલ મીડિયા પર ટેગ કરવા પર મનાઈ
બ્રુકલિન દ્વારા મોકલવામાં આવેલી કાનૂની નોટિસમાં એક વિચિત્ર માંગણી કરવામાં આવી છે. તેણે તેના માતા-પિતાને કોઈપણ સોશિયલ મીડિયા પોસ્ટમાં તેને ટેગ કરવા પર પ્રતિબંધ ફરમાવ્યો છે. રિપોર્ટ મુજબ, વિક્ટોરિયાએ બ્રુકલિનના એક 'રોસ્ટ ચિકન' વીડિયોને લાઈક કર્યો હતો, જે વાત બ્રુકલિનને પસંદ ન પડતા તેણે આ આકરું પગલું ભર્યું હોવાનું ચર્ચાઈ રહ્યું છે. નવાઈની વાત એ છે કે, તેણે તેના દાદા-દાદીને બ્લોક કર્યા નથી અને તે હજુ પણ તેમની ટિપ્પણીઓનું સ્વાગત કરે છે.
વકીલો દ્વારા જ થશે હવે વાતચીત
અહેવાલ મુજબ, બ્રુકલિને ગત ઉનાળામાં જ એક પત્ર મોકલીને વકીલો દ્વારા વાતચીત કરવાનો આગ્રહ રાખ્યો હતો. જ્યારે ડેવિડ અને વિક્ટોરિયાએ આ પત્રને ગંભીરતાથી ન લીધો, ત્યારે બ્રુકલિન અને નિકોલાએ તેમને બ્લોક કરીને કાનૂની નોટિસ ફટકારવાનો નિર્ણય લીધો હતો. વૈશ્વિક મીડિયામાં આ સમાચાર વાયુવેગે પ્રસરતા ચાહકોમાં પણ ભારે ચર્ચાઓ જાગી છે કે શું આ આલીશાન પરિવારના સંબંધો ફરી ક્યારેય સુધરશે કે કેમ?