કોલકાતા : પશ્ચિમ બંગાળના રાજકારણમાં ફરી એકવાર કાનૂની સંઘર્ષ ચરમસીમાએ પહોંચ્યો છે. મુખ્યમંત્રી મમતા બેનર્જીને કોલકાતા હાઈકોર્ટ તરફથી મોટો ઝટકો લાગ્યા બાદ હવે આ મામલો દેશની સર્વોચ્ચ અદાલત, સુપ્રીમ કોર્ટમાં પહોંચવાની પૂરેપૂરી શક્યતા છે. I-PAC સર્ચ કેસમાં એન્ફોર્સમેન્ટ ડિરેક્ટોરેટ (ED) ની કામગીરીમાં કથિત અવરોધ બદલ મમતા બેનર્જી વિરુદ્ધ તપાસનો ગાળિયો વધુ કસાય તેવી સંભાવના છે.
શું છે સમગ્ર વિવાદ?
તાજેતરમાં તપાસ એજન્સી ED દ્વારા I-PAC (રાજકીય વ્યૂહરચનાકાર પ્રશાંત કિશોર દ્વારા સ્થાપિત સંસ્થા) ના કાર્યાલય અને નિવાસસ્થાન પર સર્ચ ઓપરેશન હાથ ધરવામાં આવ્યું હતું. આ દરમિયાન મુખ્યમંત્રી મમતા બેનર્જીએ ત્યાં પહોંચીને તપાસમાં અવરોધ ઊભો કર્યો હોવાનો ED દ્વારા આરોપ લગાવવામાં આવ્યો છે. આ મામલે મમતા બેનર્જીએ હાઈકોર્ટમાં રાહતની અરજી કરી હતી, પરંતુ અદાલતે તેમને તાત્કાલિક રાહત આપવાનો સ્પષ્ટ ઈનકાર કરી દીધો છે.
ED અને રાજ્ય સરકાર વચ્ચે આરપારની લડાઈ
હાઈકોર્ટના વલણથી ઉત્સાહિત થયેલી ED હવે આ મામલાને સુપ્રીમ કોર્ટમાં લઈ જવાની તૈયારી કરી રહી છે. સૂત્રોના જણાવ્યા અનુસાર, ED આજે જ સુપ્રીમ કોર્ટમાં વિશેષ અરજી દાખલ કરી શકે છે. બીજી તરફ, પશ્ચિમ બંગાળ સરકાર પણ આ મામલે સતર્ક થઈ ગઈ છે. રાજ્ય સરકારના વકીલોએ કોઈ પણ એકતરફી આદેશ રોકવા માટે સુપ્રીમ કોર્ટમાં પહેલેથી જ ઓનલાઇન 'કેવિયેટ' દાખલ કરી દીધી છે.
રાજકીય ગરમાવો વધ્યો
આ કાનૂની લડાઈને કારણે બંગાળમાં ફરી એકવાર કેન્દ્ર અને રાજ્ય સરકાર સામસામે આવી ગયા છે. એકબાજુ એજન્સીઓ તપાસમાં અવરોધને ગંભીરતાથી લઈ રહી છે, તો બીજી બાજુ તૃણમૂલ કોંગ્રેસ આને કેન્દ્રીય એજન્સીઓનો દુરુપયોગ ગણાવી રહી છે. હવે જોવાનું એ રહેશે કે સુપ્રીમ કોર્ટ આ સંવેદનશીલ મામલે શું વલણ અપનાવે છે.