મુંબઈ : મહારાષ્ટ્રના બદલાપુરમાં બે માસૂમ બાળકીઓ પર થયેલા અત્યાચારે સમગ્ર દેશને હચમચાવી દીધો હતો, ત્યારે આ જ કેસમાં સંડોવાયેલા અને જેલની હવા ખાઈ આવેલા આરોપી તુષાર આપ્ટેને ભારતીય જનતા પાર્ટીએ ઉચ્ચ પદ આપીને નવાજતા નવો રાજકીય વિવાદ છેડાયો છે. ભાજપે તુષાર આપ્ટેને થાણે જિલ્લાના કુલગાંવ-બદલાપુર મ્યુનિસિપલ કાઉન્સિલ (KBMC) ના કો-ઓપ્ટેડ કાઉન્સિલર તરીકે નિયુક્ત કર્યા છે.
કોણ છે તુષાર આપ્ટે અને શું હતો કેસ?
ઓગસ્ટ 2024 માં બદલાપુરની એક પ્રતિષ્ઠિત શાળામાં બે ચાર વર્ષની બાળકીઓ પર શાળાના ચોકીદાર અક્ષય શિંદેએ જાતીય હુમલો કર્યો હતો. તુષાર આપ્ટે આ જ શાળા ચલાવતા ટ્રસ્ટના સેક્રેટરી હતા. આ ઘટનાની જાણ હોવા છતાં પોલીસને જાણ ન કરવા અને મામલો દબાવવાના આરોપસર આપ્ટે વિરુદ્ધ POCSO એક્ટ હેઠળ ગુનો નોંધાયો હતો. લાંબો સમય ફરાર રહ્યા બાદ તેમની ધરપકડ કરવામાં આવી હતી અને હાલમાં તેઓ જામીન પર છે.
ભાજપનો બચાવ: 'ગુનો સાબિત થયો નથી'
આ નિમણૂકનો બચાવ કરતા ભાજપના સ્થાનિક નેતાઓએ જણાવ્યું છે કે આપ્ટે એક પ્રતિષ્ઠિત સામાજિક કાર્યકર છે. તેમના પર માત્ર આરોપ લાગ્યા છે, હજુ સુધી અદાલતમાં ગુનો સાબિત થયો નથી. પક્ષ માટે તેમની સક્રિયતા અને જીતમાં ફાળાને ધ્યાને રાખીને તેમને આ જવાબદારી સોંપવામાં આવી છે. શુક્રવારે યોજાયેલી પ્રક્રિયામાં સત્તાધારી ગઠબંધન દ્વારા પાંચ કાઉન્સિલરો પસંદ કરાયા હતા, જેમાં આપ્ટેનું નામ મોખરે હતું.
વિપક્ષના આકરા પ્રહાર: 'અસંવેદનશીલતાની પરાકાષ્ઠા'
આ નિર્ણય સામે વિપક્ષી ગઠબંધન 'મહા વિકાસ આઘાડી' એ મોરચો ખોલ્યો છે. શિવસેના (UBT) નેતા સંજય રાઉતે ગંભીર આક્ષેપ કરતા કહ્યું કે, "આ ટ્રસ્ટીઓએ પીડિત પરિવારને ફરિયાદ નોંધાવતા રોકવા માટે પોલીસ પર દબાણ કર્યું હતું. શું ભાજપ હવે આવા લોકોને હોદ્દા આપશે?" NCP (SP) ના નેતા સુપ્રિયા સુલેએ આને અસંવેદનશીલતાની ચરમસીમા ગણાવી છે, જ્યારે કોંગ્રેસે સવાલ ઉઠાવ્યો છે કે શું અક્ષય શિંદેનું એન્કાઉન્ટર માત્ર આવા મોટા માથાઓને બચાવવા માટે જ કરવામાં આવ્યું હતું?
આ નિમણૂકને કારણે આગામી દિવસોમાં મહારાષ્ટ્રના ગૃહમંત્રી દેવેન્દ્ર ફડણવીસ અને શાસક પક્ષ માટે મહિલા સુરક્ષાના મુદ્દે જવાબ આપવો મુશ્કેલ બની શકે છે.