સેબુ સિટી (ફિલિપાઇન્સ) : મધ્ય ફિલિપાઇન્સના સેબુ સિટીમાં એક ભીષણ દુર્ઘટના સર્જાઈ છે. શહેરના બિનાલીવ લેન્ડફિલ (કચરાના પહાડ) નો મોટો હિસ્સો અચાનક ધસી પડતા ચાર લોકોના કમકમાટીભર્યા મોત નીપજ્યા છે. શનિવારે સત્તાવાળાઓએ મૃત્યુઆંક વધવાની પુષ્ટિ કરી છે, જ્યારે હજુ પણ અનેક લોકો કાટમાળ નીચે દબાયેલા હોવાની આશંકાએ યુદ્ધના ધોરણે બચાવ કામગીરી ચાલી રહી છે.
દુર્ઘટના સમયે 110 લોકો ફરજ પર હતા
ગુરુવારે જ્યારે આ લેન્ડફિલ ધરાશાયી થઈ ત્યારે સ્થળ પર અંદાજે 110 કામદારો હાજર હતા. કચરાના વિશાળ જથ્થા નીચે અનેક માળખાઓ અને મશીનરીઓ દબાઈ ગઈ હતી. સેબુ સિટીના મેયર નેસ્ટર આર્કાઇવલે જણાવ્યું હતું કે અત્યાર સુધીમાં 4 મૃતદેહો બહાર કાઢવામાં આવ્યા છે, જ્યારે 12 ગંભીર રીતે ઘાયલ લોકોને સારવાર માટે હોસ્પિટલ ખસેડવામાં આવ્યા છે. શુક્રવાર સુધીના આંકડા મુજબ હજુ 36 લોકો ગુમ છે, જેમના જીવિત હોવાની શક્યતા સમય પસાર થવાની સાથે ધૂંધળી થઈ રહી છે.
‘જીવનના ચિહ્નો’ મળતા આશા જાગી
બચાવ કામગીરી દરમિયાન રાહતના સમાચાર એ છે કે કાટમાળના અમુક ચોક્કસ વિસ્તારોમાં હજુ પણ 'જીવનના ચિહ્નો' (Life signs) જોવા મળ્યા છે. આ સંકેતો મળતા જ વહીવટીતંત્રે અત્યંત સાવચેતીપૂર્વક ખોદકામ શરૂ કર્યું છે. કચરાના પહાડને હટાવવા માટે 50 ટન ક્ષમતાની વિશાળ ક્રેન્સ અને આધુનિક સાધનો તૈનાત કરવામાં આવ્યા છે.
સ્વજનોની કરુણ પ્રતીક્ષા
ઘટનાસ્થળે ગુમ થયેલા કામદારોના પરિવારોની ભીની આંખો કોઈ ચમત્કારની રાહ જોઈ રહી છે. જેરાહમી એસ્પિનોઝા નામની મહિલા, જેનો પતિ આ દુર્ઘટના બાદથી ગુમ છે, તે કહે છે, "દુર્ઘટના થઈ ત્યારથી અત્યાર સુધી તેનો કોઈ પત્તો નથી, પણ અમને હજુ પણ આશા છે કે તે કાટમાળ નીચે ક્યાંક જીવિત હશે." આવા અનેક પરિવારો આશા અને નિરાશા વચ્ચે ઝોલા ખાઈ રહ્યા છે.
સેબુ સિટીની આ ઘટનાએ લેન્ડફિલ સાઇટ્સ પર કામ કરતા શ્રમિકોની સુરક્ષા અને આવા કચરાના પહાડોના વ્યવસ્થાપન સામે ગંભીર સવાલો ઉભા કર્યા છે. હાલમાં સમગ્ર સેબુ સિટી આ દુર્ઘટનાના આઘાતમાં છે.