નવી દિલ્હી:તાજેતરમાં અમેરિકાએ જે રીતે વેનેઝુએલામાં સૈન્ય કાર્યવાહી કરી સરકાર બદલી નાખી અને રાષ્ટ્રપતિને પકડી પાડ્યા, તેનાથી આખા વિશ્વમાં ખળભળાટ મચી ગયો છે. હવે આ ઘટના બાદ ચીની સોશિયલ મીડિયા પર એક જ સવાલ ગુંજી રહ્યો છે: "જો અમેરિકા વેનેઝુએલામાં ઘૂસી શકે, તો ચીન તાઇવાનના નેતાઓ સામે આવી કાર્યવાહી કેમ નથી કરતું?" આ સવાલ માત્ર સોશિયલ મીડિયા પૂરતો સીમિત નથી, પરંતુ વિશ્વના સંરક્ષણ નિષ્ણાતો પણ હવે આ શક્યતાઓને ગંભીરતાથી ચકાસી રહ્યા છે.
T-Dome’: ચીન પાસે વિશાળ સેના છે, પરંતુ તાઇવાન કાચું ખેલાડી નથી. ઇઝરાયલના ‘આયર્ન ડોમ’ની જેમ તાઇવાને પોતાનું ‘T-Dome’ તૈયાર કર્યું છે. આ એક એવી બહુ-સ્તરીય હવાઈ સંરક્ષણ પ્રણાલી છે જે ચીન તરફથી આવતા કોઈપણ વિમાન કે મિસાઇલને રસ્તામાં જ તોડી પાડવાની ક્ષમતા ધરાવે છે. તાઇવાન પાસે અમેરિકન ટેક્નોલોજીવાળી HIMARS રોકેટ સિસ્ટમ અને અત્યાધુનિક રડાર છે, જે ચીનની કોઈપણ મુવમેન્ટની મિનિટો પહેલા જાણ કરી દે છે.
: નિષ્ણાતોના મતે ચીન અને અમેરિકા વચ્ચે સૌથી મોટો તફાવત ‘યુદ્ધના અનુભવ’નો છે. અમેરિકા દાયકાઓથી મધ્ય પૂર્વ અને અન્ય દેશોમાં વાસ્તવિક યુદ્ધ લડતું આવ્યું છે, જ્યારે ચીનની આધુનિક સેનાએ છેલ્લા ઘણા દાયકાઓથી કોઈ મોટું યુદ્ધ લડ્યું નથી. ચીન પાસે અત્યાધુનિક હથિયારો ચોક્કસ છે, પણ શું તેના સૈનિકો વાસ્તવિક યુદ્ધમાં તે હથિયારોનો સચોટ ઉપયોગ કરી શકશે? આ એક મોટો સવાલ છે.
ચીન જો તાઇવાનના નેતૃત્વને ખતમ કરવા માટે ‘સ્પેશિયલ ફોર્સ’ મોકલે તો પણ તાઇવાન તેના માટે તૈયાર છે. તાઇવાનના સંરક્ષણ અધિકારીઓ વર્ષોથી આવા ‘Decapitation Strike’ (નેતૃત્વ પર સીધો હુમલો) થી બચવાની તાલીમ લઈ રહ્યા છે. જો ચીનનું આવું કોઈ ઓપરેશન નિષ્ફળ જાય, તો તે તરત જ પૂર્ણ-સ્તરના યુદ્ધમાં ફેરવાઈ શકે છે, જે ચીન માટે વૈશ્વિક સ્તરે અને આર્થિક રીતે આત્મઘાતી સાબિત થઈ શકે.
 દુનિયાની નજર અત્યારે ચીનના આગામી પગલા પર છે. જો ચીન વેનેઝુએલા જેવું સાહસ કરે તો એશિયા-પેસિફિક ક્ષેત્રમાં મોટું સંકટ ઊભું થઈ શકે છે. જોકે, તાઇવાનની મજબૂત રક્ષણાત્મક તૈયારીઓ અને અમેરિકાના સંભવિત સમર્થનને જોતા, ચીન માટે ‘વેનેઝુએલા મોડેલ’ અપનાવવું અત્યંત જોખમી અને લગભગ અશક્ય જણાય છે.