શ્રીનગર: કાશ્મીરમાં હાડ થીજવતી ઠંડી પડી રહી છે, પરંતુ આ મોસમ પ્રવાસી પક્ષીઓને ખૂબ જ માફક આવી રહી છે. શેલબુગ વેટલેન્ડમાં અંદાજે ૨.૫ લાખ પક્ષીઓ ઉમટી પડતા પક્ષી પ્રેમીઓમાં આનંદ છવાયો છે. વન વિભાગ દ્વારા આ પક્ષીઓની સુરક્ષા માટે વિશેષ પગલાં લેવામાં આવ્યા છે.

ભલે કાશ્મીરમાં ભયાનક ઠંડીને કારણે કાશ્મીરીઓનું જનજીવન મુશ્કેલ બન્યું હોય, પરંતુ પ્રવાસી પક્ષીઓને કાશ્મીરનું હવામાન અને ઠંડી ખૂબ જ પસંદ પડી રહી છે. આ જ કારણ છે કે કાશ્મીરના તમામ વેટલેન્ડ (જળપ્લાવિત વિસ્તારો) માં હાલમાં પ્રવાસી પક્ષીનો જમાવડો જોવા મળી રહ્યો છે, જે સ્થાનિકોને ખુશી આપી રહ્યો છે.

અધિકારીઓએ જણાવ્યું કે શેલબુગ વેટલેન્ડમાં ૨.૫ લાખથી વધુ પ્રવાસી પક્ષીઓ આવ્યા છે, જે કાશ્મીરના મહત્વપૂર્ણ વેટલેન્ડ આવાસમાં મોસમના હિસાબે એક મોટી સંખ્યા છે. વન્યજીવ વિભાગના અધિકારીઓએ જણાવ્યું કે આ આવક હાલની શિયાળાની સીઝન દરમિયાન નોંધવામાં આવી છે. વેટલેન્ડમાં અનેક પ્રવાસી પ્રજાતિઓ જોવા મળી છે જે કાતિલ ઠંડીથી બચવા માટે મધ્ય એશિયા, યુરોપ અને ઠંડા પ્રદેશોમાંથી હજારો કિલોમીટરની મુસાફરી કરીને આવે છે.

અધિકારીઓના જણાવ્યા મુજબ, વેટલેન્ડની અનુકૂળ પરિસ્થિતિઓ, જેમાં પર્યાપ્ત પાણીનું સ્તર, ખોરાકની ઉપલબ્ધતા અને શાંત વાતાવરણ સામેલ છે, તે આ મોસમમાં મોટી સંખ્યામાં પક્ષીઓના આગમનનું કારણ બની છે. પ્રજાતિઓની વિવિધતા અને વસ્તીના ટ્રેન્ડને નોંધવા માટે સતત દેખરેખ રાખવામાં આવી રહી છે. 

અધિકારીઓએ ઉમેર્યું કે શેલબુગ ઇકોલોજીકલ બેલેન્સ જાળવવામાં મહત્વપૂર્ણ ભૂમિકા ભજવે છે અને કાશ્મીરમાં પ્રવાસી પક્ષીઓ માટે શિયાળાનું એક મહત્વપૂર્ણ આશ્રયસ્થાન છે. માનવીય ખલેલ ઘટાડવા માટે પગલાં લેવામાં આવી રહ્યા છે અને સ્થાનિક લોકોને પક્ષીઓને પરેશાન ન કરવા અપીલ કરવામાં આવી છે.