ચેન્નઈ:દક્ષિણ ભારતીય સિનેમાના 'થલાપતિ' એટલે કે વિજયની છેલ્લી ફિલ્મ "જન નાયગન" ને લઈને ચાહકોમાં જે ભારે ઉત્સાહ હતો, તે અત્યારે નિરાશામાં ફેરવાઈ ગયો છે. પૂર્ણ-સમયના રાજકારણી બનતા પહેલા વિજયની આ અંતિમ ફિલ્મ હોવાથી બોક્સ ઓફિસ પર ઈતિહાસ રચવાની અપેક્ષા હતી, પરંતુ રિલીઝ પહેલા જ ફિલ્મને કાનૂની ગ્રહણ લાગ્યું છે. મદ્રાસ હાઈકોર્ટે સેન્સર બોર્ડની અરજી પર સુનાવણી કરતા ફિલ્મને UA સર્ટિફિકેટ આપવાના સિંગલ જજના આદેશ પર વચગાળાનો સ્ટે આપી દીધો છે. આનો સીધો અર્થ એ છે કે હવે 21 જાન્યુઆરી સુધી આ ફિલ્મ સિનેમાઘરોમાં દસ્તક આપી શકશે નહીં.

"જન નાયગન" ફિલ્મ અગાઉ 9 જાન્યુઆરી, 2026 ના રોજ વિશ્વભરમાં રિલીઝ થવાની હતી, પરંતુ સેન્ટ્રલ બોર્ડ ઓફ ફિલ્મ સર્ટિફિકેશન (CBFC) એ ફિલ્મના અમુક સંવાદો અને દ્રશ્યો સામે વાંધો ઉઠાવતા વિવાદ શરૂ થયો હતો. સેન્સર બોર્ડે ફિલ્મને પ્રમાણપત્ર આપવાનો ઈન્કાર કરી તેને રિવાઈઝિંગ કમિટી પાસે મોકલી દીધી હતી. આ નિર્ણયથી નારાજ પ્રોડક્શન હાઉસે હાઈકોર્ટના દ્વાર ખખડાવ્યા હતા. શરૂઆતમાં સિંગલ બેન્ચે ફિલ્મ મેકર્સને રાહત આપી હતી, પરંતુ સેન્સર બોર્ડે આ મામલાને પ્રતિષ્ઠાનો પ્રશ્ન બનાવી હાઈકોર્ટની મોટી બેન્ચ સમક્ષ પડકાર્યો છે.

કોર્ટમાં સેન્સર બોર્ડ વતી એડિશનલ સોલિસિટર જનરલ એ.આર. એલ. સુંદરેસને ધારદાર દલીલો કરી હતી. તેમણે જણાવ્યું કે સિંગલ જજે બોર્ડને પોતાનો પક્ષ રાખવાની પૂરતી તક આપી નથી. બોર્ડનું કહેવું છે કે ફિલ્મના કેટલાક વિવાદાસ્પદ ભાગો સામાજિક સંતુલન બગાડી શકે છે, તેથી તેને રિવાઈઝિંગ કમિટીના રિપોર્ટ વગર પ્રમાણપત્ર આપવું ઉતાવળ ગણાશે. એડિશનલ સોલિસિટર જનરલે એ વાત પર પણ ભાર મૂક્યો કે પ્રોડક્શન હાઉસે બોર્ડના અધ્યક્ષના સ્વાયત્ત નિર્ણયને યોગ્ય રીતે પડકાર્યો નથી. પરિણામે, કોર્ટે હવે પોંગલની રજાઓ પછી જ સુનાવણી હાથ ધરવાનું નક્કી કર્યું છે.

વિજયના કરોડો ચાહકો માટે આ સમાચાર આઘાતજનક છે કારણ કે તેઓ પોતાના પ્રિય અભિનેતાને છેલ્લી વાર મોટા પડદા પર જોવા માટે આતુર હતા. આ ફિલ્મ વિજયની રાજકીય કારકિર્દીના શ્રીગણેશ માનવામાં આવે છે, તેથી તેમાં રહેલા રાજકીય વિષયવસ્તુને કારણે સેન્સર બોર્ડ વધુ સતર્ક હોવાનું મનાય છે. હવે 21 જાન્યુઆરીએ હાઈકોર્ટ શું ચુકાદો આપે છે તેના પર જ ફિલ્મનું ભવિષ્ય ટકેલું છે. ત્યાં સુધી સોશિયલ મીડિયા પર #ReleaseJanNayagan ટ્રેન્ડ થઈ રહ્યું છે અને ચાહકો સોશિયલ મીડિયા દ્વારા પોતાનો આક્રોશ ઠાલવી રહ્યા છે.