મહારાષ્ટ્રના રાજકારણમાં આજે એક નવો અધ્યાય લખાવા જઈ રહ્યો છે. શિવસેના (યુબીટી) પ્રમુખ ઉદ્ધવ ઠાકરે અને મહારાષ્ટ્ર નવનિર્માણ સેનાના વડા રાજ ઠાકરે આજે મુંબઈના ઐતિહાસિક શિવાજી પાર્કમાં સંયુક્ત રેલીને સંબોધી રહ્યા છે.

આગામી બૃહદ મુંબઈ મ્યુનિસિપલ કોર્પોરેશન (બીએમસી) ની ચૂંટણીઓને ધ્યાનમાં રાખીને યોજાઈ રહેલી આ રેલી રાજકીય દૃષ્ટિએ ખૂબ જ મહત્વપૂર્ણ માનવામાં આવે છે. આશરે ૨૦ વર્ષના લાંબા ગાળા બાદ ઠાકરે પરિવારના બંને પિતરાઈ ભાઈઓ એક જ મંચ પરથી જનમેદનીને સંબોધન કરશે. 

આ ગઠબંધન સત્તાધારી ભાજપની મહાયુતિ ગઠબંધન સામે મોટો પડકાર ઊભો કરવાના હેતુથી કરવામાં આવ્યું છે. શિવાજી પાર્ક, જે શિવસેનાની રાજનીતિનું કેન્દ્રબિંદુ રહ્યું છે, ત્યાં આજે લાખોની સંખ્યામાં શિવસૈનિકો અને મનસેના કાર્યકરો ઉમટી પડે તેવી શક્યતા છે.

આજે યોજાનારી સંયુક્ત રેલી માત્ર શક્તિ પ્રદર્શન નથી, પરંતુ મુંબઈ અને મહારાષ્ટ્રના રાજકારણમાં ફરીથી ઠાકરે પરિવારનું વર્ચસ્વ સ્થાપિત કરવાનો એક પ્રયાસ છે.

ઉદ્ધવ ઠાકરે અને રાજ ઠાકરેનું સાથે આવવું એ મરાઠી મતોના વિભાજનને રોકવા અને ભાજપના નેતૃત્વવાળા ગઠબંધનને મુંબઈ મહાનગર પાલિકામાંથી દૂર રાખવાની રણનીતિનો ભાગ છે. બંને નેતાઓ આજે મુંબઈના વિકાસ, મરાઠી અસ્મિતા અને રાજ્ય સરકારની કામગીરી જેવા મુદ્દાઓ પર આક્રમક પ્રહારો કરે તેવી શક્યતા છે.

રાજકીય વિશ્લેષકોના મતે, આ પુનર્મિલન મહારાષ્ટ્રના આગામી રાજકીય સમીકરણોમાં મોટા ફેરફારો લાવી શકે છે. રેલી માટે શિવાજી પાર્કમાં ભવ્ય તૈયારીઓ કરવામાં આવી છે અને સુરક્ષાનો પણ કડક બંદોબસ્ત ગોઠવવામાં આવ્યો છે.