નવી મુંબઈ:ભારતીય ક્રિકેટના ઈતિહાસમાં બે પેઢીઓનો આવો અદભૂત સંગમ ભાગ્યે જ જોવા મળે છે. ૧૯૮૩ના વર્લ્ડ કપના મહાનાયક સુનીલ ગાવસકરે વન-ડે વર્લ્ડ કપ 2025ની વિજેતા ટીમની સ્ટાર ખેલાડી જેમિમા રોડ્રિગ્સને એક એવી સરપ્રાઈઝ આપી કે સોશિયલ મીડિયા પર તેની ચર્ચાએ જોર પકડ્યું છે. લિટલ માસ્ટરે જેમિમાને બેટના આકારનું એક ખાસ કસ્ટમાઇઝ્ડ ગિટાર ભેટમાં આપ્યું છે, જેને જેમિમાએ 'બૅટાર' (બેટ + ગિટાર) નામ આપ્યું છે. નવી મુંબઈની એક હોટેલમાં આ બંને દિગ્ગજોએ સાથે મળીને મ્યુઝિક સેશન માણ્યું હતું, જેનો વીડિયો અત્યારે વાયરલ થઈ રહ્યો છે.

આ ભેટ પાછળ એક રસપ્રદ કહાની જોડાયેલી છે. વર્ષ 2025ના વન-ડે વર્લ્ડ કપની સેમી ફાઇનલમાં ઓસ્ટ્રેલિયા સામે જેમિમાએ જ્યારે ૧૨૭ રનની અવિસ્મરણીય ઇનિંગ રમી હતી, ત્યારે ગાવસકરે વચન આપ્યું હતું કે જો ભારત વર્લ્ડ કપ જીતશે, તો તેઓ જેમિમા સાથે ગીત ગાશે. ભારત ચેમ્પિયન બન્યું અને હવે વિમેન્સ પ્રીમિયર લીગ (WPL) 2026ની શરૂઆત પહેલા ગાવસકરે પોતાનું એ વચન પૂરું કર્યું છે. ૨૫ વર્ષની જેમિમા મેદાન પર જ્યારે પણ સદી ફટકારે છે ત્યારે તે ગિટાર વગાડવાની એક્શન કરીને સેલિબ્રેશન કરે છે, જેનાથી ગાવસકર ખૂબ પ્રભાવિત થયા હતા.

ગાવસકર અને જેમિમાની આ મુલાકાત મ્યુઝિકલ સાંજમાં ફેરવાઈ ગઈ હતી. જેમિમાએ તેના નવા 'બૅટાર' પર સુર છેડ્યા હતા અને બંનેએ સાથે મળીને બોલીવુડનું સુપરહિટ ગીત ‘યે દોસ્તી હમ નહીં તોડેંગે’ ગાયું હતું. ગાવસકરના અવાજમાં છુપાયેલા ગાયકને જોઈને જેમિમા પણ આશ્ચર્યચકિત થઈ ગઈ હતી. જેમિમાએ સોશિયલ મીડિયા પર આ પળોને શેર કરતા લખ્યું કે, "સુનીલ સરે પોતાનું વચન પાળ્યું છે. આ માત્ર ગિટાર નથી, પણ એક લાગણી છે. આ શાનદાર 'બૅટાર' સાથે જેમિંગ કરવાની મજા જ કંઈક અલગ હતી."

આ અનોખી ભેટ માટે ગાવસકરે એક જાણીતી બ્રાન્ડ સાથે કોલાબોરેશન કર્યું હતું. જેમિમા જેવી યુવા ટેલેન્ટને પ્રોત્સાહિત કરવાની ગાવસકરની આ રીત ક્રિકેટ જગતમાં ખૂબ વખણાઈ રહી છે. આ ઘટનાએ સાબિત કરી દીધું છે કે ક્રિકેટ માત્ર મેદાન પરના ચોગ્ગા-છગ્ગા પૂરતી મર્યાદિત નથી, પરંતુ તે બે પેઢીઓ વચ્ચેના સંબંધો અને આદરનું પણ પ્રતીક છે. WPLની શરૂઆત પહેલા મળેલી આ પ્રેરણા જેમિમા માટે આગામી મેચોમાં ઉર્જાનું કામ કરશે તે નિશ્ચિત છે.