ગીર સોમનાથ:પ્રભાસ પાટણની પવિત્ર ધરા પર આજે 'સોમનાથ સ્વાભિમાન પર્વ' નિમિત્તે આયોજિત 'શૌર્ય સભા'માં ભક્તિ, શક્તિ અને રાષ્ટ્રવાદનો ત્રિવેણી સંગમ જોવા મળ્યો હતો. સભામાં ઉપસ્થિત હજારોની મેદનીએ હાથમાં અનોખા પ્લે-કાર્ડ્સ ધારણ કરીને સોમનાથની અવિનાશી ગાથાને વિશ્વ ફલક પર ઉજાગર કરી હતી. 'શાશ્વત અને અવિનાશી સોમનાથ' તથા 'આસ્થા અમર છે' તેવા ગુંજતા સૂત્રો સાથે લોકોએ ભારતીય અસ્મિતાના પ્રતિક સમાન આ જ્યોતિર્લિંગની રક્ષા અને સ્વાભિમાન માટે પ્રાણ ન્યોછાવર કરનારા પૂર્વજોને શ્રદ્ધાંજલિ અર્પી હતી. મેદાનમાં ચારેતરફ લહેરાતા પ્લે-કાર્ડ્સે વાતાવરણને શૌર્યના રંગે રંગી દીધું હતું.

આ શૌર્ય સભા માત્ર ઇતિહાસના સ્મરણ પૂરતી મર્યાદિત નહોતી, પરંતુ તેમાં ભવિષ્યના 'વિકસિત ભારત'નું પ્રતિબિંબ પણ દેખાતું હતું. લોકોએ 'વિકસિત ભારત - 2047', 'આત્મનિર્ભર યુવા' અને 'મારી ધરતી - મારી પ્રોડક્ટ' જેવા સંદેશા ધરાવતા કાર્ડ્સ પ્રદર્શિત કરીને વડાપ્રધાન નરેન્દ્ર મોદીના વિઝન પ્રત્યે પોતાની કટિબદ્ધતા દર્શાવી હતી. લોખંડી પુરુષ સરદાર પટેલના સંકલ્પથી નવનિર્મિત સોમનાથ આજે મોદીના નેતૃત્વમાં વૈશ્વિક પ્રવાસન અને શ્રદ્ધાનું કેન્દ્ર બન્યું છે, તેનો આનંદ લોકોના ચહેરા પર સ્પષ્ટ વર્તાતો હતો. આધુનિક ભારતની નેમને ચરિતાર્થ કરતા આ સંદેશાઓએ સભામાં નવી ઉર્જાનો સંચાર કર્યો હતો.

સભાનો સૌથી રોમાંચક ક્ષણ એ હતી જ્યારે લોકોએ પોતાના પ્રિય નેતા અને વડાપ્રધાન નરેન્દ્ર મોદીના આગમનને પ્લે-કાર્ડ્સ ઊંચા કરીને વધાવ્યું હતું. 'સર્વજન હિતાય - સર્વજન સુખાય'ના મંત્ર સાથે કલ્યાણકારી યોજનાઓ અને રાષ્ટ્રના સર્વાંગી વિકાસ માટે જનતાએ મોદી સરકારનો આભાર વ્યક્ત કર્યો હતો. ગીર સોમનાથની જનતાએ જે રીતે શિસ્તબદ્ધ રીતે 'સંકલ્પ અને સ્વાભિમાનની ગાથા'ને ઉજાગર કરી, તેનાથી સ્પષ્ટ થાય છે કે સોમનાથની આ પવિત્ર ભૂમિ આજે પણ શૌર્ય અને સાહસનું અખંડ કેન્દ્ર છે. એક પણ શબ્દ બોલ્યા વિના માત્ર પ્લે-કાર્ડ્સના માધ્યમથી લોકોએ કરોડો દેશવાસીઓ સુધી ગૌરવશાળી ભારતનો સંદેશો પહોંચાડ્યો હતો.

અંતમાં, આ શૌર્ય સભા એ વાતની સાક્ષી પૂરે છે કે ભારત પોતાની પ્રાચીન સંસ્કૃતિ અને આધુનિક વિકાસને સાથે લઈને પ્રગતિ કરી રહ્યું છે. લોખંડી પુરુષની સંકલ્પ ગાથાથી લઈને આજના આત્મનિર્ભર ભારત સુધીની સફર સોમનાથના સાનિધ્યમાં વધુ તેજોમય બની છે. ઉપસ્થિત જનમેદનીએ લીધેલા સંકલ્પો આગામી પેઢી માટે પ્રેરણારૂપ સાબિત થશે. સોમનાથ સ્વાભિમાન પર્વ માત્ર એક ઉત્સવ નથી, પરંતુ તે ભારતીય અસ્મિતાના પુનરુત્થાનનો મહોત્સવ છે, જેનો પડઘો સમગ્ર વિશ્વમાં સંભળાઈ રહ્યો છે.