વોશિંગ્ટન: ઈરાનમાં વણસતી જતી પરિસ્થિતિ વચ્ચે અમેરિકી રાષ્ટ્રપતિ ડોનાલ્ડ ટ્રમ્પ હવે દેખાવકારોની મદદે આવવા માટે લશ્કરી કાર્યવાહી સહિતના વિકલ્પો વિચારી રહ્યા છે. 'ધ જેરુસલેમ પોસ્ટ' અને 'ટેલિગ્રાફ'ના અહેવાલ મુજબ, ટ્રમ્પે સિદ્ધાંતિક રીતે ઈરાનના વિરોધ પક્ષને મદદ કરવાનો નિર્ણય લીધો છે.

અમેરિકન સંરક્ષણ વિભાગ સમક્ષ અત્યારે ત્રણ મુખ્ય વિકલ્પો છે:

૧. ઈરાનના સુરક્ષા દળો અને શાસનના મહત્વના ઠેકાણાઓ પર સીધા લશ્કરી હવાઈ હુમલા કરવા.

૨. ઈરાની શાસન વિરુદ્ધ સાયબર હુમલાઓ કરવા અને તેમની સિસ્ટમ ઠપ કરવી.

૩. દેખાવકારોને ઈન્ટરનેટ સુવિધા મળી રહે તે માટે 'સ્ટારલિંક' સિસ્ટમ્સ પૂરી પાડવી.

જોકે, મધ્ય પૂર્વમાં તૈનાત અમેરિકન કમાન્ડરોએ ચેતવણી આપી છે કે કોઈપણ હુમલો કરતા પહેલા તેમને તૈયારી માટે થોડો સમય જોઈએ છે. જેથી તેઓ અમેરિકન સૈન્ય મથકોની સુરક્ષા મજબૂત કરી શકે અને ઈરાન તરફથી થતા સંભવિત વળતા હુમલાનો સામનો કરી શકે. 

મંગળવારે વરિષ્ઠ અધિકારીઓ ટ્રમ્પને આ અંગે વિસ્તૃત માહિતી આપશે.