તેલંગાણામાં ૩ દિવસમાં ૩૦૦ રખડતા કૂતરાઓના મોત
પ્રાણી પ્રેમીની ફરિયાદના આધારે ૯ લોકો સામે કેસ દાખલ : પશુ કલ્યાણ કાર્યકરોએ આરોપીઓ પર કૂતરાઓને ઝેર આપીને મારી નાખવાનો આરોપ લગાવ્યો છે
હૈદરાબાદ,તા.૧૨: તેલંગાણાના હનમકોંડા જિલ્લામાં લગભગ ૩૦૦ રખડતા કૂતરાઓની કથિત હત્યાનો કેસ પ્રકાશમાં આવ્યો છે. પોલીસે આ ગંભીર ઘટનાના સંદર્ભમાં નવ લોકો સામે કેસ નોંધ્યો છે. પોલીસ અધિકારીઓએ રવિવારે જણાવ્યું હતું કે આ મામલો પ્રાણી ક્રૂરતા સાથે સંબંધિત છે અને તેની સંપૂર્ણ તપાસ ચાલી રહી છે. પશુ કલ્યાણ કાર્યકરો અદુલાપુરમ ગૌતમ અને ફરઝાના બેગમે ૯ જાન્યુઆરીએ શ્યામપેટ પોલીસ સ્ટેશનમાં આ સંદર્ભમાં ફરિયાદ નોંધાવી હતી.
તેમની ફરિયાદમાં, તેઓએ આરોપ લગાવ્યો હતો કે શ્યામપેટ અને અરેપલ્લી ગામોમાં ૬ જાન્યુઆરીના ત્રણ દિવસમાં આશરે ૩૦૦ રખડતા કૂતરાઓને ઝેર આપીને મારી નાખવામાં આવ્યા હતા. તેમનો આરોપ છે કે તેમના મૃત્યુ પછી, તેમના મૃતદેહો ગામની સીમમાં ફેંકી દેવામાં આવ્યા હતા. અદુલાપુરમ અને ફરઝાનાનો આરોપ છે કે ગામના સરપંચો અને ગ્રામ પંચાયત સચિવો આ કૃત્યમાં સામેલ હતા.
ફરિયાદ મુજબ, સરપંચો અને પંચાયત સચિવોએ રખડતા કૂતરાઓને ઝેર આપવા અને બાદમાં તેમના મૃતદેહોનો નિકાલ કરવા માટે બે વ્યક્તિઓને રાખ્યા હતા. પ્રાણી કલ્યાણ કાર્યકરોએ આ કૃત્યને અમાનવીય અને ગેરકાયદેસર ગણાવ્યું છે અને ગુનેગારો સામે કડક કાર્યવાહીની માંગ કરી છે. પોલીસે જણાવ્યું હતું કે ફરિયાદના આધારે, શ્યામપેટ પોલીસ સ્ટેશનમાં નવ આરોપીઓ સામે ભારતીય દંડ સંહિતાની કલમ ૩૨૫ અને પ્રાણીઓ પ્રત્યે ક્રૂરતા નિવારણ અધિનિયમ, ૧૯૬૦ ની કલમ ૧૧(૧) હેઠળ કેસ નોંધવામાં આવ્યો છે.
તપાસ અધિકારીઓના જણાવ્યા અનુસાર, ફોન રેકોર્ડિગ અને સાક્ષીઓના નિવેદનો પરથી જાણવા મળ્યું છે કે પોલીસ કેસ દાખલ થાય તે પહેલાં કેટલાક આરોપીઓએ પ્રાણી અધિકાર કાર્યકરો સાથે ખાનગી વાતચીતમાં રખડતા કૂતરાઓને માર્યા હોવાની કબૂલાત કરી હતી. ભૂતપૂર્વ કેન્દ્રીય મંત્રી મેનકા ગાંધીએ દરમિયાનગીરી કરતાં આ બાબત રાષ્ટ્રીય સ્તરે ચર્ચામાં આવી હતી. તેમણે વરિષ્ઠ અધિકારીઓ સાથે વાત કરી અને સ્થાનિક પોલીસને કેસ યોગ્ય રીતે નોંધવા સૂચના આપી. તેમણે તપાસને મજબૂત બનાવવા માટે પ્રાણીના અવશેષોનું પોસ્ટમોર્ટમ કરાવવા અને ફોરેન્સિક પુરાવા એકત્રિત કરવાનો પણ આગ્રહ રાખ્યો.
અધિકારીઓએ જણાવ્યું હતું કે પ્રથમ દ્રષ્ટિએ કેસ ગંભીર લાગે છે અને તમામ આરોપોની તપાસ કરવામાં આવી રહી છે. પોલીસે જણાવ્યું હતું કે કેસના તમામ પાસાઓની સંપૂર્ણ તપાસ કરવામાં આવશે અને દોષિતો સામે કાયદા મુજબ કડક કાર્યવાહી કરવામાં આવશે. દરમિયાન, પ્રાણી કલ્યાણ સંગઠનોએ આ ઘટનાની સખત નિદા કરી છે અને રાજ્ય સરકારને ભવિષ્યમાં આવી ઘટનાઓ અટકાવવા માટે નક્કર પગલાં લેવાની માંગ કરી છે.
(1:30 PM IST)
છેલ્લા 8 દિવસમાં સૌથી લોકપ્રિય 
