વેરાવળ : સોમનાથ સ્‍વાભિમાન પર્વ અંતર્ગત સોમનાથ મંદિર પરિસરમાં ભવ્‍ય અને આકર્ષક ડ્રોન શોનું આયોજન કરવામાં આવ્‍યું હતું. આ અનોખા આયોજનથી પવિત્ર સોમનાથ ધામમાં ઉત્‍સવમય અને આનંદસભર માહોલ સર્જાયો હતો. આ ડ્રોન શોમાં અંદાજે ૩૦૦૦ જેટલા ડ્રોનના સહારે અરબી સમુદ્ર ઉપર આકાશમાં પ્રકાશના સુમેળભર્યા સંયોજન દ્વારા વિવિધ બિંદુચિત્રો સર્જવામાં આવ્‍યા હતા. આકાશમાં ઊભરાતા પ્રકાશમય દૃશ્‍યો લોકઆકર્ષણનું મુખ્‍ય કેન્‍દ્ર બન્‍યા હતા. વડાપ્રધાન નરેન્‍દ્રભાઈ મોદી તથા મુખ્‍યમંત્રી ભુપેન્‍દ્રભાઈ પટેલે સોમનાથ મંદિરના પટાંગણમાં ઉપસ્‍થિત રહી આ ભવ્‍ય ડ્રોન શો નિહાળી આનંદ વ્‍યક્‍ત કર્યો હતો. આ પ્રસંગે ઉપસ્‍થિત લોકોએ પણ આ અદભૂત દૃશ્‍યાવલિ નિહાળી ગૌરવ અને આનંદની લાગણી અનુભવી હતી. ડ્રોન શો પૂર્ણ થયા બાદ તુરંત જ નજીકના દરિયા કિનારે ભવ્‍ય આતશબાજી થઈ હતી, વિવિધ પ્રકારના ક્રેકર્સથી આકાશ રંગબેરંગી થઈ ગયું હતું.(તસ્‍વીર-અહેવાલ : દિપક કક્કડ - વેરાવળ)