નાલાસોપારા : પાલઘર જિલ્લાના નાલાસોપારા પશ્ચિમમાં આવેલી જાણીતી રાયન ઇન્ટરનેશનલ સ્કૂલ અત્યારે વિવાદોના વંટોળમાં ફસાઈ છે. શાળાના પરિસરમાં બાંગ્લાદેશનો ધ્વજ જોવા મળતા સ્થાનિક રહેવાસીઓ અને હિન્દુ સંગઠનોમાં ભારે આક્રોશ ફાટી નીકળ્યો છે. આ ઘટનાનો વીડિયો સોશિયલ મીડિયા પર વાયુવેગે ફેલાતા જ બજરંગ દળ અને અન્ય જૂથોએ શાળા પર પહોંચીને વિરોધ પ્રદર્શન કર્યું હતું.
બાંગ્લાદેશી ધ્વજ પર બજરંગ દળનો આકરો પ્રહાર
નાલાસોપારાના પંચાલ નગર સ્થિત આ શાળામાં જ્યારે બાંગ્લાદેશનો ધ્વજ ફરકતો દેખાયો, ત્યારે બજરંગ દળે તેને ભારતની અસ્મિતા પર પ્રહાર ગણાવ્યો હતો. બજરંગ દળે સોશિયલ મીડિયા પર સ્પષ્ટ ચેતવણી આપતા જણાવ્યું કે, "જ્યારે બાંગ્લાદેશમાં આપણી હિન્દુ બહેન-દીકરીઓ સુરક્ષિત નથી અને લઘુમતીઓની હત્યા થઈ રહી છે, ત્યારે ભારતીય ધરતી પર તેમનો ધ્વજ સહન કરવામાં આવશે નહીં. અહીં ફક્ત ભારતનો ત્રિરંગો જ સન્માનપૂર્વક લહેરાશે."
પોલીસની હાજરીમાં ધ્વજ ઉતારવામાં આવ્યો
હિન્દુ સંગઠનોના વિરોધ બાદ પોલીસ કાફલો શાળા પર દોડી ગયો હતો. પોલીસની મધ્યસ્થી બાદ પરિસ્થિતિ પર કાબૂ મેળવવામાં આવ્યો હતો અને ધ્વજ હટાવવાની પ્રક્રિયા હાથ ધરવામાં આવી હતી. જોકે, શાળા પ્રશાસન દ્વારા હજુ સુધી આ બાબતે કોઈ સત્તાવાર સ્પષ્ટતા કરવામાં આવી નથી કે આ ધ્વજ કોઈ કાર્યક્રમનો ભાગ હતો કે અન્ય કોઈ કારણસર ત્યાં રાખવામાં આવ્યો હતો.
બાંગ્લાદેશમાં હિન્દુઓ પર થતી હિંસાનો સંદર્ભ
આ વિવાદ પાછળનું મુખ્ય કારણ બાંગ્લાદેશમાં છેલ્લા કેટલાક દિવસોથી હિન્દુ લઘુમતીઓ પર થઈ રહેલા હુમલાઓ છે. તાજેતરમાં જ ત્યાં જોય મહાપાત્રો સહિત અનેક હિન્દુ પુરુષોની હત્યા અને મહિલાઓ પર અત્યાચારના અહેવાલો સામે આવ્યા છે. આવા સમયે ભારતમાં બાંગ્લાદેશી ધ્વજનું પ્રદર્શન લોકરોષને વહોરી રહ્યું છે.
આ ઘટનાએ નાલાસોપારામાં કોમી તણાવ ઉભો ન થાય તે માટે પોલીસ અત્યારે સતર્ક છે અને સોશિયલ મીડિયા પર અફવાઓ ન ફેલાવવા અપીલ કરી રહી છે.