ઉદયપુર: બોલીવુડ અભિનેત્રી કૃતિ સેનનની નાની બહેન નુપૂર સેનન અને લોકપ્રિય સિંગર સ્ટેબિન બેને ગઈકાલે ૧૧ જાન્યુઆરીએ ઉદયપુરના શાહી ઠાઠ સાથે લગ્ન કરી લીધા છે. સોશિયલ મીડિયા પર આ કપલે તેમના હિન્દુ રીતિ-રિવાજ મુજબના લગ્નની તસવીરો શેર કરી છે, જે જોતા જ ચાહકો મંત્રમુગ્ધ થઈ ગયા છે. આ પહેલા કપલે વ્હાઇટ વેડિંગ (ક્રિશ્ચિયન વેડિંગ) પણ કર્યા હતા.

વરમાળા અને સાત ફેરાનો રોમાંચ

લગ્નની લેટેસ્ટ તસવીરોમાં નુપૂર સેનન ચેરી રેડ અને પીચ કલરના કોમ્બિનેશન વાળા લહેંગામાં ખૂબ જ સુંદર દેખાઈ રહી હતી. તેની સાથે તેણે હેવી જ્વેલરી અને માથા પર પલ્લું રાખીને ટ્રેડિશનલ લુક અપનાવ્યો હતો. બીજી તરફ, સ્ટેબિન બેને વ્હાઇટ કલરની શેરવાની અને માથા પર પાઘડી પહેરીને શાહી લુક ધારણ કર્યો હતો. વરમાળા સમયે બંનેના ચહેરા પરની ખુશી સ્પષ્ટ દેખાતી હતી.

બહેન કૃતિએ નિભાવી ખાસ ફરજ

લગ્નની વિધિઓ દરમિયાન કૃતિ સેનન સતત તેની બહેનની પડખે ઉભી જોવા મળી હતી. સિંદૂરદાનની વિધિ વખતે કૃતિએ બહેન નુપૂરનો માંગ ટીકો સંભાળીને એક આદર્શ બહેનની ફરજ નિભાવી હતી. આ ઉપરાંત, બ્રાઇડલ એન્ટ્રી સમયે પણ કૃતિ સેનન તેની બહેનનો હાથ પકડીને મંડપ સુધી લાવી હતી.

ફેમિલી ફોટો અને ઈમોશનલ કેપ્શન

નુપૂર સેનને આ સુંદર તસવીરો શેર કરતા કેપ્શનમાં લખ્યું, "તુ મેરે કલ દા સુકૂન તે અજ્જ દા શુક્ર. ૧૧.૦૧.૨૦૨૬." આ સાથે તેણે ઈવિલ આઈ (નજર ન લાગે તેવું) ઈમોજી પણ મૂક્યું હતું. કપલે પરિવાર સાથે પણ એક યાદગાર તસવીર શેર કરી છે જેમાં સેનન અને બેન પરિવાર સાથે જોવા મળે છે.