કોલકાતા: પશ્ચિમ બંગાળમાં કેન્દ્રીય તપાસ એજન્સી ED અને મમતા બેનર્જી સરકાર વચ્ચેનો સંઘર્ષ હવે ચરમસીમાએ પહોંચ્યો છે. ૮ જાન્યુઆરી ૨૦૨૬ના રોજ આઈ-પેક (I-PAC) અને પ્રતીક જૈનના ઠેકાણાઓ પર થયેલી દરોડાની કાર્યવાહીમાં અવરોધ ઊભો કરવા બદલ EDએ સુપ્રીમ કોર્ટના દ્વાર ખખડાવ્યા છે. એજન્સીએ મુખ્યમંત્રી મમતા બેનર્જી, રાજ્યના ડીજીપી રાજીવ કુમાર અને કોલકાતા પોલીસ કમિશનર મનોજ વર્મા વિરુદ્ધ ગંભીર કાયદાકીય અરજી દાખલ કરી છે.
 EDનો દાવો છે કે આ સમગ્ર મામલો ₹૨,૭૪૨.૩૨ કરોડના કોલસાની હેરાફેરી અને મની લોન્ડરિંગના મોટા કૌભાંડ સાથે જોડાયેલો છે. તપાસ એજન્સીએ સુપ્રીમ કોર્ટને જણાવ્યું છે કે આ કૌભાંડના ₹૨૦ કરોડથી વધુની રકમ હવાલા ચેનલ દ્વારા રાજકીય કન્સલ્ટન્સી ફર્મ I-PAC સુધી પહોંચાડવામાં આવી હતી. આ જ કનેક્શન શોધવા માટે જ્યારે ટીમ પાર્ક સ્ટ્રીટ અને બિધાનનગર સ્થિત ઓફિસો પર પહોંચી ત્યારે હંગામો થયો હતો.
EDએ પોતાની અરજીમાં અત્યંત ચોંકાવનારો આક્ષેપ કર્યો છે કે જ્યારે અધિકારીઓ પ્રતીક જૈનના નિવાસસ્થાને સર્ચ કરી રહ્યા હતા, ત્યારે મુખ્યમંત્રી મમતા બેનર્જી ૧૦૦થી વધુ પોલીસકર્મીઓ સાથે ત્યાં પહોંચી ગયા હતા. એવો આક્ષેપ છે કે જપ્ત કરાયેલા લેપટોપ, મોબાઈલ અને દસ્તાવેજો પોલીસ બળજબરીથી પોતાની સાથે લઈ ગઈ હતી અને લગભગ બે કલાક સુધી પોતાની કસ્ટડીમાં રાખ્યા હતા, જેનાથી પુરાવાઓ સાથે છેડછાડ થવાની પૂરેપૂરી શક્યતા છે.
 ED ના અધિકારીઓ પર કોલકાતાના અલગ-અલગ પોલીસ સ્ટેશનમાં ચાર FIR દાખલ કરવામાં આવી છે. આ કાર્યવાહીને એજન્સીએ 'બદલાની ભાવના' ગણાવી છે અને સુપ્રીમ કોર્ટ પાસે માંગ કરી છે કે:
• આ સમગ્ર ઘટનાની નિષ્પક્ષ CBI તપાસ કરાવવામાં આવે.
• ED અધિકારીઓ વિરુદ્ધ થયેલી FIR પર તાત્કાલિક સ્ટે મૂકવામાં આવે.
• જપ્ત કરાયેલા ડિજિટલ પુરાવાઓને સુરક્ષિત કરી તેનું ફોરેન્સિક ઓડિટ કરવામાં આવે.
બીજી તરફ, I-PAC ફર્મે સોશિયલ મીડિયા પર નિવેદન જારી કરીને કોઈ પણ રાજકીય ડેટા જપ્ત થયો હોવાનો ઈનકાર કર્યો છે અને તપાસમાં સહકાર આપવાની વાત કરી છે. હવે જોવાનું એ રહેશે કે સુપ્રીમ કોર્ટ આ મામલે મમતા સરકારને શું ફટકાર લગાવે છે.