નવી દિલ્હી | તા.13 : ભારતીય બોક્સિંગના સુવર્ણ ઇતિહાસની લેજન્ડ ખેલાડી એમ.સી. મેરી કોમ હાલમાં રમતગમતના મેદાનને કારણે નહીં, પરંતુ પોતાની અંગત જીંદગીમાં ચાલી રહેલા હાઈ-વોલ્ટેજ ડ્રામાને કારણે ચર્ચામાં છે. મેરી કોમના પૂર્વ પતિ કારુંગ ઓન્કોલેર (ઓનલર) એ બોક્સર પર લગ્નેત્તર સંબંધોના ગંભીર અને વિસ્ફોટક આરોપો લગાવીને સનસનાટી મચાવી દીધી છે. ઓનલરનો દાવો છે કે મેરી કોમના વર્ષ 2013માં એક જુનિયર બોક્સર સાથે અને 2017 થી પોતાની જ એકેડેમીના એક વ્યક્તિ સાથે પ્રેમ સંબંધો હતા.
છેતરપિંડીના આરોપનો વળતો પ્રહાર
આ વિવાદની શરૂઆત ત્યારે થઈ હતી જ્યારે મેરી કોમે ઓનલર પર કરોડો રૂપિયાની છેતરપિંડી કરવાનો અને તેમની જમીન પચાવી પાડવાનો આરોપ લગાવ્યો હતો. આ આક્ષેપોનો જવાબ આપતા ઓનલરે સમાચાર એજન્સીને જણાવ્યું કે, "મેરી કોમ જૂઠું બોલી રહી છે. તે પોતે જ બીજા સંબંધો બનાવવા માંગતી હતી અને તેથી તેણે મને બદનામ કરવાનું શરૂ કર્યું છે. મારી પાસે તેના વોટ્સએપ મેસેજ અને તે વ્યક્તિના નામ સાથેના પુરાવા છે જેની સાથે તેના સંબંધો હતા." ઓનલરે એમ પણ કહ્યું કે તે 18 વર્ષ સુધી ચૂપ રહ્યો, પણ હવે જ્યારે તેના પર પૈસા ચોરવાનો આરોપ લાગ્યો છે ત્યારે સત્ય કહેવું જરૂરી છે.
ભાવનાત્મક લડાઈ અને બાળકોનું ભવિષ્ય
મેરી કોમ અને ઓનલરના લગ્ન 2005માં થયા હતા અને તેમને ચાર બાળકો છે. 2023માં બંનેના છૂટાછેડા થઈ ચૂક્યા છે. ઓનલરે ભાવનાત્મક સુરે કહ્યું કે, "મેં તેને તેની કારકિર્દીના દરેક તબક્કે સાથ આપ્યો, પણ આજે તેની પાસે બધું જ છે અને હું દિલ્હીમાં ભાડાના મકાનમાં રહું છું. તે કહે છે કે મેં 5 કરોડ ચોર્યા, તો તેને પુરાવા લાવવા કહો." બીજી તરફ મેરી કોમનું કહેવું છે કે જ્યારે તેઓ 2022માં ઈજાગ્રસ્ત હતા, ત્યારે તેમને ખબર પડી કે ઓનલરે તેમની મિલકતો ગીરવે મૂકીને લોન લીધી હતી.
સેલિબ્રિટી સ્ટેટસ અને વિવાદનો વંટોળ
મેરી કોમે તાજેતરમાં મીડિયાને અપીલ કરી હતી કે તેમને એકલી છોડી દેવામાં આવે અને તેમની નિંદા કરવાનું બંધ થાય. જોકે, ઓનલરના નવા દાવાઓએ આ વિવાદને વધુ ઉગ્ર બનાવ્યો છે. ઓનલરે આરોપ લગાવ્યો કે મેરી કોમ દારૂ અને ગુટખાનું સેવન પણ કરે છે, જે બાબત તેણે ક્યારેય જાહેર કરી ન હતી. દેશની સૌથી પ્રતિષ્ઠિત એથ્લેટની છબી આ કાનૂની અને અંગત લડાઈને કારણે ખરડાઈ રહી છે. હવે જોવાનું એ રહેશે કે મેરી કોમ આ ગંભીર આરોપો પર શું પ્રતિક્રિયા આપે છે.