રાજકોટ : સુરત શહેર પોલીસ કમિશનર અનુપમસિંહ ગેહલોત દ્વારા શરૂ કરવામાં આવેલા "નો સાયબર ફ્રોડ ઇન સુરત" અભિયાનને એક બમ્પર સફળતા પ્રાપ્ત થઈ છે. સુરત ક્રાઈમ બ્રાન્ચે 'ઓપરેશન મ્યુલ હન્ટ' અંતર્ગત દેશભરમાં કરોડો રૂપિયાની છેતરપિંડી કરનાર એક આંતરરાષ્ટ્રીય સાયબર ગેંગનો પર્દાફાશ કર્યો છે. પ્રાથમિક તપાસમાં ૨૦૦૦ કરોડથી વધુના આંકડા સામે આવતા સુરત સહિત સમગ્ર રાજ્યના પોલીસ બેડામાં ખળભળાટ મચી ગયો છે.
નેપાળ અને કંબોડિયાથી ચાલતું હતું રેકેટ:
જોઈન્ટ પોલીસ કમિશનર રાઘવેન્દ્ર વત્સ અને ડીસીપી ક્રાઈમ ભાવેશ રોજિયાના નેતૃત્વમાં પીઆઈ એસ.એન. પરમાર તથા તેમની ટીમ દ્વારા હાથ ધરાયેલી તપાસમાં ચોંકાવનારા ખુલાસા થયા છે. આ ગેંગના તાર નેપાળ અને કંબોડિયા જેવા દેશો સાથે જોડાયેલા હોવાનું સામે આવ્યું છે. આરોપીઓ વિદેશમાં બેસીને ભારતીય નિર્દોષ નાગરિકોના નામે ડમી બેંક એકાઉન્ટ્સ (મ્યુલ એકાઉન્ટ્સ) ખોલાવતા હતા અને તે ખાતાઓમાં સાયબર ફ્રોડની રકમ ટ્રાન્સફર કરી વિદેશમાં વટાવતા હતા.
પકડાયેલા મુખ્ય આરોપીઓ અને મોડસ ઓપરેન્ડી:
પોલીસ દ્વારા જાહેર કરાયેલ યાદી મુજબ, મધ્યપ્રદેશ અને રાજસ્થાનના મૂળ રહેવાસી એવા અનેક રીઢા ગુનેગારોને ઝડપી લેવામાં આવ્યા છે.
 * મુખ્ય આરોપીઓ: મુકેશકુમાર આશાશાહ સ્વામી (૨૫), અક્ષયલાલ ઉર્ફે પિન્ટુ મંગળજી ઠાકોર (૨૪), માતારામ વાગારામ પાલીવાલ (૪૮) અને ભાલારામ દલારામજી રબારી (૪૫) નો સમાવેશ થાય છે.
 * આરોપીઓ એનજીઓ (NGO) ની આડમાં અથવા નોકરીની લાલચ આપી સામાન્ય લોકો પાસેથી તેમના દસ્તાવેજો મેળવી બેંક ખાતા ખોલાવતા હતા. આ ખાતાઓની કિટ સીધી નેપાળ કે કંબોડિયા મોકલવામાં આવતી હતી.
વોન્ટેડ આરોપીઓની શોધખોળ તેજ:
આ કેસમાં હજુ પણ અનેક મુખ્ય સૂત્રધારો પોલીસ પકડથી દૂર છે, જેમાં દિલિપકુમાર મુનારામ કિશોર (મધ્યપ્રદેશ), અક્ષયકુમાર મધુભાઈ રાઠોડ (રાજસ્થાન), ગિરધારી લાલજી (મધ્યપ્રદેશ) અને ફુલચંદજી બૈરવા (રાજસ્થાન) નો સમાવેશ થાય છે. આ આરોપીઓને પકડવા માટે ક્રાઈમ બ્રાન્ચે અલગ-અલગ ટીમો બનાવી તપાસનો વ્યાપ વધાર્યો છે.
સાયબર સુરક્ષા પર ભાર:
ડીસીપી ભાવેશ રોજિયાએ જણાવ્યું હતું કે, આ રેકેટમાં હજુ વધુ મોટા ખુલાસા થવાની શક્યતા છે. આંતરરાષ્ટ્રીય સ્તરે નાણાકીય વ્યવહારો થતા હોવાથી કેન્દ્રીય એજન્સીઓની પણ મદદ લેવામાં આવી શકે છે. લોકોએ પોતાનો પાન કાર્ડ કે આધાર કાર્ડ અજાણ્યા વ્યક્તિને ન આપવા અને કોઈના કહેવાથી બેંકમાં ખાતું ન ખોલાવવા માટે પોલીસે અપીલ કરી છે.