નવી દિલ્હી  : રશિયા પાસેથી સસ્તું ક્રૂડ ઓઇલ ખરીદવાની બાબતમાં ભારતની રફ્તાર ધીમી પડી છે. યુરોપિયન થિંક ટેન્ક 'સેન્ટર ફોર રિસર્ચ ઓન એનર્જી એન્ડ ક્લીન એર' (CREA) ના તાજેતરના અહેવાલ મુજબ, ડિસેમ્બર ૨૦૨૫ માં રશિયન અશ્મિભૂત ઇંધણના ખરીદદારોની યાદીમાં ભારત હવે ત્રીજા સ્થાને આવી ગયું છે. અગાઉ ભારત બીજા સ્થાને હતું, પરંતુ હવે તુર્કીએ ભારતને પાછળ છોડી દીધું છે.

રિલાયન્સની જામનગર રિફાઇનરીએ આયાત અડધી કરી

ભારતની આયાતમાં આવેલા આ ઘટાડા પાછળનું મુખ્ય કારણ રિલાયન્સ ઇન્ડસ્ટ્રીઝની જામનગર રિફાઇનરી છે. ડિસેમ્બર મહિનામાં રિલાયન્સે રશિયા પાસેથી થતી તેની આયાતમાં ૫૦ ટકાનો કાપ મૂક્યો હતો. આ ઉપરાંત, ભારતની સરકારી તેલ કંપનીઓએ પણ આયાતમાં ૧૫ ટકાનો ઘટાડો નોંધાવ્યો છે. નોંધનીય છે કે નવેમ્બરમાં ભારતે ૩.૩ બિલિયન યુરોનું ઇંધણ ખરીદ્યું હતું, જે ડિસેમ્બરમાં ઘટીને ૨.૩ બિલિયન યુરો પર આવી ગયું છે.

અમેરિકી પ્રતિબંધોની દેખીતી અસર

અમેરિકા દ્વારા રશિયાની બે મોટી તેલ કંપનીઓ 'રોઝનેફ્ટ' અને 'લુકોઇલ' પર લાદવામાં આવેલા પ્રતિબંધોની અસર હવે ભારતીય કંપનીઓ પર દેખાઈ રહી છે. HPCL અને મેંગલોર રિફાઇનરી જેવી કંપનીઓએ હાલ પૂરતી રશિયાથી ખરીદી ઘટાડી દીધી છે. જોકે, ઇન્ડિયન ઓઇલ (IOC) જેવી કંપનીઓ હજુ પણ તે રશિયન કંપનીઓ પાસેથી ખરીદી કરી રહી છે જેના પર પ્રતિબંધો નથી.

ચીન હજુ પણ નંબર-1 ખરીદદાર

વૈશ્વિક સ્તરે રશિયન ઇંધણનો સૌથી મોટો ખરીદદાર ચીન રહ્યો છે. ચીને રશિયાની કુલ નિકાસ આવકમાં ૪૮ ટકાનો હિસ્સો આપ્યો છે, જે આશરે ૬ બિલિયન યુરો થાય છે. બીજી તરફ, તુર્કી ૨.૬ બિલિયન યુરોની ખરીદી સાથે બીજા સ્થાને પહોંચી ગયું છે. અહેવાલ મુજબ, ભારત હજુ પણ રશિયન તેલને રિફાઇન કરીને યુરોપ અને અમેરિકા જેવા દેશોમાં નિકાસ કરી રહ્યું છે, જોકે આ નિકાસમાં પણ છેલ્લા મહિનામાં ૯ ટકાનો ઘટાડો જોવા મળ્યો છે.