મુંબઈ : ભારતીય સમાજમાં આજે પણ આંતરજાતિય લગ્નો (Inter-caste Marriage) ને લઈને અનેક સામાજિક અને કૌટુંબિક પડકારો જોવા મળે છે. આ માનસિકતાને બદલવા અને સામાજિક એકતાને પ્રોત્સાહન આપવા માટે મહારાષ્ટ્ર સરકારે એક ક્રાંતિકારી યોજના અમલમાં મૂકી છે. આ યોજના હેઠળ, જે યુગલો આંતરજાતિય લગ્ન કરે છે તેમને સરકાર તરફથી કુલ ₹3 લાખની માતબર નાણાકીય સહાય પૂરી પાડવામાં આવશે.

કેવી રીતે મળશે ₹3 લાખની સહાય?

આ યોજનાનો ઉદ્દેશ્ય સમાજમાં વ્યાપેલા જાતિગત ભેદભાવને ઘટાડવાનો છે. આ અંતર્ગત મળનારી કુલ રકમમાં બે ભાગ છે:

૧. મહારાષ્ટ્ર સરકારના સામાજિક ન્યાય વિભાગ તરફથી ₹50,000 આપવામાં આવે છે.

૨. કેન્દ્ર સરકારના ડૉ. બાબાસાહેબ આંબેડકર ફાઉન્ડેશન તરફથી ₹2.5 લાખ ની સહાય મળે છે.

આ રકમ દંપતીના સંયુક્ત બેંક ખાતામાં સીધી ટ્રાન્સફર કરવામાં આવે છે, જેથી તેઓ પોતાના નવા જીવનની શરૂઆત આર્થિક સુરક્ષા સાથે કરી શકે.

યોજનાનો લાભ મેળવવા માટેની શરતો

આ યોજનાનો લાભ લેવા માટે સરકારે અમુક માપદંડો નક્કી કર્યા છે:

· રહેવાસી: પતિ અને પત્ની બંને મહારાષ્ટ્રના કાયમી રહેવાસી હોવા જોઈએ.

· જાતિગત શ્રેણી: દંપતીમાંથી કોઈ પણ એક વ્યક્તિ અનુસૂચિત જાતિ (SC), અનુસૂચિત જનજાતિ (ST), VJ, NT અથવા SBC શ્રેણીમાંથી હોવી જોઈએ.

· નોંધણી: લગ્ન હિન્દુ લગ્ન અધિનિયમ 1955 અથવા ખાસ લગ્ન અધિનિયમ 1954 હેઠળ નોંધાયેલા હોવા જોઈએ.

· ઉંમર અને પ્રથમ લગ્ન: વરની ઉંમર 21 વર્ષ અને કન્યાની 18 વર્ષથી વધુ હોવી જોઈએ. આ બંનેના પ્રથમ લગ્ન હોવા અનિવાર્ય છે.

અરજી કરવાની પ્રક્રિયા

આ યોજનાનો લાભ લેવા માંગતા યુગલો ઓનલાઈન અને ઓફલાઈન બંને રીતે અરજી કરી શકે છે. ઓનલાઈન અરજી માટે મહારાષ્ટ્ર સરકારના સામાજિક ન્યાય વિભાગની સત્તાવાર વેબસાઇટનો સંપર્ક કરવાનો રહેશે, જ્યારે ઓફલાઈન માટે જિલ્લા સમાજ કલ્યાણ અધિકારીની કચેરીએ જઈને ફોર્મ ભરી શકાય છે. અરજી માટે આધાર કાર્ડ, જાતિનું પ્રમાણપત્ર, લગ્ન નોંધણી પત્ર અને બેંક વિગતો જેવા દસ્તાવેજો જરૂરી રહેશે.