નવી દિલ્હી: ભારતીય સેના પ્રમુખ જનરલ ઉપેન્દ્ર દ્વિવેદીએ આજે એક મહત્વની પ્રેસ કોન્ફરન્સમાં દેશની સુરક્ષા સ્થિતિ અંગે હિંમતભર્યું નિવેદન આપ્યું છે. તેમણે સ્પષ્ટ કર્યું કે પશ્ચિમી મોરચા અને જમ્મુ-કાશ્મીરમાં પરિસ્થિતિ સંવેદનશીલ હોવા છતાં સંપૂર્ણપણે ભારતીય સેનાના નિયંત્રણમાં છે. આર્મી ચીફે જણાવ્યું કે કાશ્મીર હવે 'આતંકવાદથી પર્યટન' તરફ સફળતાપૂર્વક આગળ વધી રહ્યું છે.
સેના પ્રમુખે આંકડાકીય વિગતો આપતા જણાવ્યું કે વર્ષ 2025માં અત્યાર સુધીમાં 31 આતંકવાદીઓને ઠાર કરવામાં આવ્યા છે. ચોંકાવનારી વાત એ છે કે આમાંથી 65% આતંકીઓ પાકિસ્તાની મૂળના હતા. ઓપરેશન મહાદેવ હેઠળ પહેલગામ હુમલાના ત્રણ મુખ્ય આરોપીઓને પણ સેનાએ ખતમ કરી દીધા છે. તેમણે વધુમાં ઉમેર્યું કે હવે કાશ્મીરમાં સક્રિય સ્થાનિક આતંકવાદીઓની સંખ્યા માત્ર એક અંકમાં (સિંગલ ડિજિટ) રહી ગઈ છે, જે એક મોટી સિદ્ધિ છે.
 પાકિસ્તાન દ્વારા મોકલવામાં આવતા ડ્રોન અંગે જનરલ દ્વિવેદીએ કહ્યું કે 10 થી 12 જાન્યુઆરી દરમિયાન સરહદ પર અનેક નાના રક્ષણાત્મક ડ્રોન જોવા મળ્યા હતા. તેમણે કહ્યું, "પાકિસ્તાન આપણી શિથિલતા કે નબળાઈ શોધવાનો પ્રયાસ કરી રહ્યું છે, પરંતુ તેને દર વખતે નકારાત્મક જવાબ જ મળ્યો છે." આ બાબતે ભારતીય DGMO એ પાકિસ્તાની સમકક્ષ સાથે વાત કરી છે અને આવી હરકતો તાત્કાલિક બંધ કરવા કડક સૂચના આપી છે.
 સેના પ્રમુખે પાકિસ્તાનને ચેતવણી આપતા કહ્યું કે સરહદ પાર હજુ પણ 8 આતંકવાદી તાલીમ શિબિરો સક્રિય છે અને ભારતની તેના પર સતત નજર છે. તેમણે ભારપૂર્વક કહ્યું કે 'ઓપરેશન સિંદૂર' હજુ પણ ચાલુ છે અને ભવિષ્યમાં પાકિસ્તાન તરફથી કરવામાં આવતા કોઈપણ દુઃસાહસનો સેના મજબૂત રીતે જવાબ આપશે.
કાશ્મીરમાં બદલાતા માહોલ વિશે તેમણે ખુશી વ્યક્ત કરતા કહ્યું કે 4 લાખથી વધુ શ્રદ્ધાળુઓએ શાંતિપૂર્ણ રીતે અમરનાથ યાત્રા કરી અને પ્રવાસનમાં મોટો ઉછાળો આવ્યો છે, જે દર્શાવે છે કે જમ્મુ-કાશ્મીર હવે વિકાસના પંથે છે.