લંડન: યુકેમાં એચથ્રીએનટુ વાયરસના 'સબક્લેડ કે' નામના નવા સ્ટ્રેનને કારણે હોસ્પિટલોમાં દર્દીઓની સંખ્યામાં મોટો ઉછાળો આવ્યો છે. સામાન્ય શરદી-ખાંસી કરતા આ ફ્લૂમાં તાવ લાંબો સમય રહે છે અને સાથે ઉલ્ટી-ડાયેરિયા જેવી તકલીફો પણ જોવા મળી રહી છે. સ્થિતિ એટલી ગંભીર છે કે કેટલીક હોસ્પિટલોએ 'ક્રિટિકલ ઈન્સિડન્ટ' જાહેર કરવા પડ્યા છે.

 

બ્રિટનમાં હાલમાં ફ્લૂના એક નવા અને ચિંતાજનક પ્રકારને કારણે આરોગ્ય વ્યવસ્થા પર મોટું દબાણ આવ્યું છે. ડોક્ટરોએ ચેતવણી આપી છે કે ફ્લૂનો આ નવો સ્ટ્રેન, જેને 'સબક્લેડ કે' તરીકે ઓળખવામાં આવે છે, તે સમગ્ર યુકેમાં ઝડપથી ફેલાઈ રહ્યો છે. આ વાયરસ એચથ્રીએનટુ સબટાઈપનો જ એક પ્રકાર છે, પરંતુ તેના લક્ષણો સામાન્ય ફ્લૂ કરતા થોડા અલગ અને વધુ ગંભીર જોવા મળી રહ્યા છે.

 

હોસ્પિટલોમાં દર્દીઓની સંખ્યામાં સતત વધારો થઈ રહ્યો છે. 

 

જાન્યુઆરીની શરૂઆતમાં જ દૈનિક ધોરણે હોસ્પિટલમાં દાખલ થનારા દર્દીઓની સંખ્યા ૨,૯૨૪ સુધી પહોંચી ગઈ હતી. આરોગ્ય સેવાઓ પરના અસહ્ય દબાણને કારણે સરે અને કેન્ટ વિસ્તારના ચાર હોસ્પિટલ ટ્રસ્ટોએ 'ક્રિટિકલ ઈન્સિડન્ટ' (ગંભીર ઘટના) જાહેર કરી છે. આનો અર્થ એ છે કે હોસ્પિટલો તેમની ક્ષમતા કરતા વધારે દબાણ હેઠળ કામ કરી રહી છે.

 

તબીબી નિષ્ણાતોના જણાવ્યા મુજબ, આ નવા વેરિએન્ટમાં દર્દીઓને સામાન્ય કરતા વધુ તીવ્ર તાવ આવે છે. ફેફસાના નિષ્ણાત ડો. જુઆનિતા મોરાના જણાવ્યા અનુસાર, આ નવા સ્ટ્રેનમાં દર્દીઓને ખૂબ જ સખત તાવ આવે છે, જે લાંબા સમય સુધી ઉતરતો નથી. ઘણા કિસ્સાઓમાં પેરાસિટામોલ કે આઈબુપ્રોફેન જેવી સામાન્ય દવાઓ લીધા પછી પણ તાવ નીચે આવતો નથી અને આ તાવ ૭ દિવસ સુધી રહી શકે છે.

 

આ ઉપરાંત, દર્દીઓમાં કફ ભરાઈ જવો અને ભયંકર ખાંસી જેવા લક્ષણો પણ જોવા મળે છે. ડોક્ટરો માટે સૌથી ચિંતાનો વિષય એ છે કે શ્વસનતંત્રના લક્ષણો ઉપરાંત, આ ફ્લૂમાં પેટને લગતી ગંભીર સમસ્યાઓ પણ દેખાઈ રહી છે. 

 

ડો. માર્ક લોફમેનના જણાવ્યા મુજબ, ઘણા દર્દીઓમાં ઉલ્ટી, ડાયેરિયા અને પેટમાં દુખાવો જેવા ગેસ્ટ્રોઇન્ટેસ્ટાઇનલ લક્ષણો જોવા મળી રહ્યા છે, જે સામાન્ય ફ્લૂમાં ઓછા જોવા મળતા હોય છે. આ સાથે શરીરમાં અસહ્ય દુખાવો, સાંધાનો દુખાવો અને અત્યંત થાક લાગવો તે પણ આ વેરિએન્ટના મુખ્ય લક્ષણો છે.

 

એનએચએસ (નેશનલ હેલ્થ સર્વિસ) ના મેડિકલ ડાયરેક્ટર પ્રોફેસર મેઘના પંડિતે જણાવ્યું હતું કે, શિયાળાની આ ઋતુમાં હોસ્પિટલો માટે હજુ ખરાબ સમય પૂરો થયો નથી. ફ્લૂ અને અન્ય શ્વસન વાયરસના કેસોમાં ફરીથી વધારો થઈ રહ્યો છે.

 

ડોક્ટરોની સલાહ છે કે જો લક્ષણો સામાન્ય હોય તો ઘરે જ આરામ કરવો, પુષ્કળ પાણી પીવું અને શરીરને હુંફાળું રાખવું. જોકે, જો ૩૮ ડિગ્રી સેલ્સિયસ કે તેથી વધુ તાવ આવે, શ્વાસ લેવામાં તકલીફ પડે અથવા લક્ષણો અઠવાડિયા પછી પણ ન સુધરે, તો તબીબી સલાહ લેવી જરૂરી છે. આ નવા સ્ટ્રેનના વિચિત્ર લક્ષણોને કારણે લોકોએ સાવચેત રહેવાની ખાસ જરૂર છે.

 

બ્રિટનના હેલ્થ સેક્રેટરી વેસ સ્ટ્રીટિંગે પણ લોકોને સાવચેત કરતા જણાવ્યું હતું કે, ફ્લૂ ગંભીર સ્વરૂપ ધારણ કરી શકે છે. તેમણે કહ્યું કે, "ખાસ કરીને વૃદ્ધો, નાના બાળકો અને જેમને પહેલાથી જ કોઈ બીમારી છે તેમના માટે ફ્લૂ જોખમી બની શકે છે. આથી રસીકરણ (વેક્સિનેશન) એ જ શ્રેષ્ઠ સુરક્ષા છે. હું પાત્રતા ધરાવતા દરેક વ્યક્તિને વિનંતી કરું છું કે તેઓ વહેલી તકે ફ્લૂની રસી મુકાવી લે". પ્રોફેસર મેઘના પંડિતે પણ લોકોને રાબેતા મુજબ સારવાર લેવા અને રસી મુકાવીને સુરક્ષિત રહેવા અનુરોધ કર્યો છે.

​એનએચએસના જણાવ્યા અનુસાર, સામાન્ય શરદી કરતા ફ્લૂના લક્ષણો વધુ ઝડપથી અને ગંભીર રીતે આવે છે. જોકે મોટાભાગના લોકો એક અઠવાડિયામાં સ્વસ્થ થઈ જાય છે, પરંતુ તે દરમિયાનનો અનુભવ ખૂબ જ પીડાદાયક હોઈ શકે છે.