મુંબઈ: મહારાષ્ટ્રમાં આગામી નગર નિગમની ચૂંટણીઓને ધ્યાનમાં રાખીને રાજ્ય સરકાર અને ચૂંટણી પ્રશાસને કાયદો અને વ્યવસ્થા જાળવી રાખવા માટે મહત્વનો નિર્ણય લીધો છે. રાજ્યના 29 મહાનગરપાલિકા વિસ્તારોમાં 14 જાન્યુઆરીથી 16 જાન્યુઆરી સુધી 'ડ્રાય ડે' જાહેર કરવામાં આવ્યો છે. આ સમયગાળા દરમિયાન દારૂના વેચાણ અને સેવન પર સંપૂર્ણ પ્રતિબંધ રહેશે.

મુખ્ય હકીકતો અને સમયપત્રક પ્રશાસન દ્વારા જાહેર કરાયેલા આદેશ મુજબ, ચૂંટણી પ્રક્રિયાના ત્રણ મહત્વના તબક્કાઓને આવરી લેતા આ મુજબ પ્રતિબંધ અમલી રહેશે:

14 જાન્યુઆરી: ચૂંટણી પૂર્વનો દિવસ (ડ્રાય ડે)

15 જાન્યુઆરી: મતદાનનો દિવસ (સંપૂર્ણ પ્રતિબંધ)

16 જાન્યુઆરી: મતગણતરી અને પરિણામનો દિવસ (ડ્રાય ડે)

13 જાન્યુઆરીની સાંજે ચૂંટણી પ્રચારના પડઘમ શાંત થતાની સાથે જ આ આદેશ અમલમાં આવી ગયો છે. આ નિયમ હેઠળ તમામ વાઇન શોપ, બાર, પરમિટ રૂમ અને હોટલોમાં દારૂ પીરસવા કે વેચવા પર સખત મનાઈ ફરમાવવામાં આવી છે.

તંત્રની કડક કાર્યવાહીની ચેતવણી ચૂંટણી અધિકારીઓના જણાવ્યા અનુસાર, આ નિર્ણય પાછળનો મુખ્ય ઉદ્દેશ્ય ચૂંટણી પ્રક્રિયાને નિષ્પક્ષ, પારદર્શી અને હિંસામુક્ત બનાવવાનો છે. ઘણીવાર ચૂંટણી ટાણે મતદારોને રિઝવવા કે વાતાવરણ ડહોળવા માટે નશીલા પદાર્થોનો ઉપયોગ થતો હોય છે, જેને રોકવા માટે પોલીસ અને સ્થાનિક તંત્રને સતર્ક રહેવા સૂચના અપાઈ છે.

નિર્ધારિત મ્યુનિસિપલ સીમાઓની અંદર જો કોઈ પણ દુકાનદાર કે વ્યક્તિ આ નિયમોનું ઉલ્લંઘન કરતા ઝડપાશે, તો તેમની સામે કડક કાનૂની કાર્યવાહી કરવામાં આવશે. પ્રશાસને નાગરિકો અને વેપારીઓને સહકાર આપવા અપીલ કરી છે, જેથી લોકશાહીનો આ ઉત્સવ કોઈ પણ અપ્રિય ઘટના વગર સંપન્ન થઈ શકે. હાલમાં સંવેદનશીલ વિસ્તારોમાં પોલીસ દ્વારા સઘન પેટ્રોલિંગ પણ શરૂ કરી દેવામાં આવ્યું છે.