હૈદરાબાદ: તા.૧૪: આજે સમગ્ર દક્ષિણ ભારતમાં મકરસંક્રાંતિના ત્રણ દિવસીય ઉત્સવનો પ્રથમ દિવસ એટલે કે 'ભોગી' પરંપરાગત શ્રદ્ધા અને ઉલ્લાસ સાથે ઉજવવામાં આવી રહ્યો છે. માર્ગઝી મહિનાના છેલ્લા દિવસે તમિલનાડુ અને તેલંગાણામાં લોકોએ વહેલી સવારે પોતાના ઘરની બહાર પવિત્ર અગ્નિ (બોનફાયર) પ્રગટાવીને જૂની અને બિનજરૂરી વસ્તુઓનો હોમ કર્યો હતો, જે અનિષ્ટના નાશ અને નવા પ્રારંભનું પ્રતીક માનવામાં આવે છે.
પરંપરા અને પર્યાવરણનો સમન્વય
ગામડાઓથી લઈને શહેરો સુધી, લોકોએ પોતાના ઘરોને સાફ-સુધરા કરી, તેને સફેદ રંગથી રંગીને પ્રવેશદ્વાર પર આકર્ષક રંગોળીઓ અને કેરીના પાનના તોરણો સજાવ્યા છે. જોકે, આ વર્ષે પર્યાવરણની જાળવણી માટે સરકાર દ્વારા ખાસ અપીલ કરવામાં આવી હતી. રાજ્ય પ્રદૂષણ નિયંત્રણ બોર્ડે પ્લાસ્ટિક, ટાયર અને રબર જેવી વસ્તુઓ ન સળગાવવા સૂચના આપી છે. ચેન્નાઈમાં વહેલી સવારે ધુમાડા અને ધુમ્મસને કારણે વિઝિબિલિટી ૩૦૦ મીટર સુધી ઘટી ગઈ હતી, જેના પર પ્રદૂષણ બોર્ડ સતત દેખરેખ રાખી રહ્યું છે.
ગામડાઓમાં ઉત્સવનો અનોખો મિજાજ
આકાશવાણીના અહેવાલ મુજબ, બાળકો વહેલી સવારથી જ નાના ડ્રમ (ટોમ-ટોમ) વગાડીને અગ્નિની આસપાસ નાચતા-કૂદતા જોવા મળ્યા હતા. ખેતી પ્રધાન વિસ્તારોમાં ખેડૂતોએ પાકની લણણી બાદ ઘાસ અને લાકડામાંથી વિશેષ અગ્નિ પ્રગટાવીને કુદરતનો આભાર માન્યો હતો. શેરીઓમાં ઠેર-ઠેર રંગોળી સ્પર્ધાઓનું આયોજન કરવામાં આવ્યું છે, જે પ્રવાસીઓ માટે પણ આકર્ષણનું કેન્દ્ર બની છે.
તેલંગાણામાં પતંગોની રંગત
બીજી તરફ તેલંગાણામાં પણ ભોગીની ધામધૂમથી ઉજવણી થઈ રહી છે. હૈદરાબાદના સિકંદરાબાદ સ્થિત પરેડ ગ્રાઉન્ડ ખાતે આંતરરાષ્ટ્રીય પતંગ મહોત્સવનો પ્રારંભ થયો છે, જેમાં ૨૦ થી વધુ દેશોના પતંગબાજો ભાગ લઈ રહ્યા છે. હૈદરાબાદનું આકાશ અત્યારે રંગબેરંગી અને અવનવા આકારના પતંગોથી છવાઈ ગયું છે. આવતીકાલે જ્યારે વસંત ઋતુના આગમન સમાન 'થાઈ' મહિનાનો પ્રથમ દિવસ હશે, ત્યારે મકરસંક્રાંતિ અને પોંગલની ઉજવણી ચરમસીમાએ પહોંચશે.